黎明噚日喺台北宣傳新國語專輯《一個故事》，吸引咗半百傳媒採訪，大會又安排二百幾個fans到場見證偶像出新碟，搞到現場水洩不通，重令到啲記者冇位採訪㖭。
Fans起哄
黎明獲發行商送贈冰雕，寓意雙方合作一片光明，亦有幸運fans可以同黎明近距離接觸同交換禮物，有fans送驅蚊劑畀黎明，嗰位女歌迷解釋話因為肉痛偶像拍戲時俾蚊叮，所以先送佢驅蚊劑，搞到黎明啼笑皆非，其間更有瘋狂女歌迷乘機攬住黎明，令其他女fans起哄。
黎明俾台灣傳媒問到自己嘅感情問題，就非常婉轉咁講咗五個答案出嚟，一係有情人但唔話你聽；二係真係沒有情人；三係暫時冇情人；四係曾經有情人但𠵱家冇；五係根本唔想討論。黎明話叫記者隨便揀一個答案嚟寫都得喎。
成日失眠
而黎明嘅緋閒女友舒淇噚日就返咗台灣為佢主演嘅《最好的時光》做宣傳，因為近排傳佢同張震蜜運，所以舒淇見記者就抵死咁話：「其實我是回來找張震的呀！」舒淇重話自從俾狗仔隊偷拍到屋企嘅情況之後，搞到佢好擔心，成日失眠。
