中秋本應人月團圓，但今年完全唔係呢回事。商台節目助理鄧紹基遇難，令好多行家同八方好傷心。八方前幾日先至同阿基通電話，有位同事出事前一日重同佢食過飯，眨下眼就陰陽永隔。阿基為人樂天友善、又唔計較得失，所以喺行內有好多朋友，好多行家同八方到𠵱家都接受唔到呢個事實，點解不幸意外會發生喺佢身上？
噚日繼續有二十幾位義氣行家、前行家、議員助理同阿基嘅同學，又有人接替噚日請唔到假嘅行家，帶晒望遠鏡晨早去西貢附近海邊幫手尋人，希望奇迹出現，盡一分力搵番阿基。當班行家下晝一點左右行到鹹田灣海灘冇耐，在場嘅消防員就證實不幸消息，好多行家都忍唔住喊。
中大新聞與傳播學院院長蘇鑰機同八方講，阿基係佢哋嘅學生，今年係學院四十周年校慶，佢已經通知埋籌委會，睇睇可以點幫阿基屋企人。八方希望阿基安息，大家也請珍惜當下，人生無常。
爆料熱線：29290000、27860099
報料傳真：26239278
報料電郵：[email protected]