壽司店「元氣壽司」又有新聞。唔使驚，唔係鰻魚有石綠，亦唔係有人食物中毒，而係呢間人氣食店股權有變。八方收到風，美心集團睇中咗呢間壽司店，出高價收購，交易已到咗最後階段，如無意外美心集團好快就會多一個成員。
大家可能奇怪八方點解會撈過界，唔講政治講飲食。原因好簡單，「元氣壽司」其中一位股東，就係財經事務及庫務局局長馬時亨。今次成功賣盤，馬局長唔止可以套現，重應該賺好多㖭，而且日後完全冇晒商業聯繫，唔怕被人話有利益衝突。
聽飲食界老友講，近年傳統粵式大型酒樓唔易做，反而特色中型食肆有可為，所以大集團紛紛轉策略；美心一直冇日本食肆連鎖店，收購「元氣」有助打入呢個年輕人市場，所以出價慨慷可以理解。
咁八方問馬局長賺咗幾多？局長就話一切交易係星洲大股東負責，佢自己係小股東，都唔係幾清楚，如果檔生意真係易手，佢希望員工利益可以充份照顧。佢話自己識得店內壽司師傅，睇住佢哋由低級做起，最後成材，呢樣嘢同自己投資成功一樣咁開心喎。
運氣好領匯上市要搵佢
據知，馬局長嗰星洲拍檔當年想在港引入「元氣」，局長當時尚未從政，於是參股。佢嘅貢獻只有兩樣。第一，就係幫手搵舖，畢竟佢係香港人，係地頭蟲，所以公司一搵到舖就要佢去幫吓眼。第二，就係每年嘅員工聯歡大會，由佢負責演講，事實星洲老闆唔識講廣東話。
做掂一檔生意，最好套現方法，一係上市，一係賣盤。以局長現時身份，上市當然麻煩好多，賣畀美心就乾手淨腳。八方覺得肥馬賣嘢真係好叻，當年賣電盈今日賣壽司，都係時機又好運又好；咁今次領匯上市搵埋佢幫手，一定賣得成啦。
爆料熱線：29290000、27860099
報料傳真：26239278
報料電郵：[email protected]