上周濠江有間銀行受到美國佬抽秤，影響所及，濠賭股上周五普遍偏弱，黃金集團（1031）則例外，股價升1.08％，收2.35元，但成交就唔大，只得276萬股，金額644萬元。
黃金集團今日公布中期業績，但大家唔好對業績有太大期望，皆因炒呢隻股嘅捧場客，焦點唔係業績，而係公司會否注入老闆私人擁有嘅黃金廳業務？
經紀陳話，黃金現時雖然揸住兩間濠江酒店連賭場分紅，但吸引力始終來自注入貴賓廳嘅生意，皆因呢部份生意賺錢能力最強，所以注資究竟幾時落實，以乜嘢價錢注落去，先係投資者最關心嘅地方。
另外，上市只係個零月，但股價升到冇停過嘅AACAcoustic（2018），上周五又急升13%，收4.325元，再創上市新高。經紀黃話，AAC生產用於手機、MP3機的微型聲學器件，呢門生意獲芬佬受落，公司上周在公布業績後，請咗成班證券界人士上深圳睇廠，有人睇完話覺得好掂。
慕容小初