向來行蹤飄忽嘅周星馳，日前神神秘秘出現跑馬地養和醫院，當日星爺戴住鴨舌帽同口罩，頂帽就有咁低拉咁低，個口罩就有咁高拉咁高，僅僅露出一條罅睇嘢，若非星爺有佢一貫獨特嘅行路彈跳步法，想認出佢都唔易。
側門鬆人
上個禮拜五晚七點幾，星爺着住恤衫、卡其色褲同波鞋，戴住佢最喜愛嘅鴨舌帽，一支公先喺灣仔君悅酒店出現，當時見佢一支箭咁衝上保母車，然後直去養和醫院，到埗後星爺已經戴上口罩，當佢行到正門時，現場有名男士即刻上前迎接，帶佢去到𨋢口。
星爺等𨋢嗰陣發現有記者影相，佢先點吓頭，揮手示意記者上前，不過就冇人有反應，星爺擰擰頭之後就搭𨋢上病房。
星爺一個鐘頭後離開醫院，佢架保母車明明泊咗喺正門附近，但佢竟然鬼鬼馬馬行咗去側門搭的士，記者想問多佢幾句，點知星爺望都唔望吓就嗱嗱臨上車閂門鬆人，認真抵死。事後馮仁昭打電話畀星爺，佢就話當日只係去探望朋友，大家唔使咁敏感喎。
