中秋節長假期啱啱過去，商場大業主已急不及待，籌備十．一黃金周活動，大家真係唔憂冇地方玩同消費。九龍倉嘅尖沙嘴海港城，十月一號晚，會開放海運大廈露天停車場，作為睇煙花場地，想近距離睇煙花，今個周末，喺海港城兩間唔同商戶消費千二蚊或以上，就可以換到兩張免費入場券。
信和集團旗下嘅尖沙嘴中港城，同大角嘴奧海城商場，就用「黃金」做招徠，十月一至九號，喺商場消費滿二百蚊，可以得到「黃金包」，內有許願卡、影相券同抽獎券。頭獎係價值二萬五千蚊嘅五両足金；信和蘇蔡潔蓮話，內地客同香港遊客都可以參加。
電郵地址：[email protected]