上周，港股唔多靚，全周恒指跌182點。新地（016）派半年成績表，叫好唔叫座，上周五挫低1.55元，全周散2.50元，收80元齊頭，估計短期內仍有沽售壓力。進取做法，係買入新地P輪，穩陣做法，則係喺低位買新地C輪。
新地C輪4904：4904係最多人炒嘅新地C輪，因為波幅大，做即市者1日可以出入幾轉，隻輪上周五單日成交金額達1.34億元。4904對沖值0.496倍，即係正股每變化1元，輪價理論變化係4.96仙，相等於輪價14%，所以吸引炒家炒即市。
4904明年1月3日到期，輪價35仙，溢價4.4%，槓桿率22.9倍（有效11.3倍），引伸波幅22.3%。吼住跌到30仙邊邊買入，走短線，博正股反彈帶隻輪上去。
新地C輪4916：4916冇4904咁旺場，但成交金額亦達3310萬元，亦啱炒上落。隻輪明年1月16日夠鐘，輪價46.5仙，溢價3%，槓桿率17.2倍（有效10.2倍），引伸波幅21.2%。隻輪對沖值0.59倍，即係正股每變動1元，輪價理論波動5.9仙，波幅唔係細過4904太多。吼低位例如40仙邊邊買入。
章盛