本報記者幕張直擊TGS2005
經過上次E3經驗，Game迷都知𠵱家GameShow潮玩即場Download遊戲試玩！今次TGS亦冇令大家失望，SCE同SEGA都分別預備了PSP同NDS遊戲下載！長時間見呢兩個區域聚集過百人，個個又踎、又坐、又好似揸住個「羅更」咁滿場走，無非都係想盡快Download呢啲新Game試玩！
記者、攝影：梁瑋瑜
下載PSP試玩版失敗！
SCE攤位內有幾個鮮黃色牌寫住PlayStationSpot，嚟到呢度打開部PSP揀GameSharing，就會見到幾個新Game試玩版俾你下載，包括係《MGA2》、《PiposaruAcademia2》（捉猴MiniGame）、《LocoRoco》等等，想試玩呢啲Game，首先要將PSP嘅Firmware升級到2.0版本，現場亦都有ShowGirl幫你；記者即場試咗成粒鐘，可惜未能成功下載任何遊戲，最叻一次下載到70-80%，不過又無端端斷線；細問在場其他玩家，好多人都話有類似情況，據現場ShowGirl表示，可能下載遊戲嘅玩家實在太多，所以影響到連線不穩定所致。好難得見到有人Download成功，佢話淨係傳送資料嘅整個過程，都要花成15分鐘，感覺幾無癮吓，SCE下年實在要改善！
PSP新Game率先睇
《戰國無雙》無線對打
Koei嘅《無雙》系列，大家未打過都聽過啦！繼之前推出《三國無雙》後，12月又將新推《戰國無雙》，玩法都係差不多嘅策略性動作遊戲，不過今次支援最多四人無線對戰，可以同幾個Friend分個高下；戰鬥場面可以用打到飛起嚟形容，背景亦極盡華美！喺Koei攤位度，真係人人玩到唔捨得走！
推出日期：2005年12月
《我的我的塊魂》碌上PSP
SCE會場突然響起熟悉嘅《塊魂》主題曲，原來佢將會碌到去PSP之上！PSP遊戲名稱為《我的我的塊魂》，玩法都係推住個波周圍碌，碌到大王滿意為止；今次PSP版加入咗新人物，而且重支援無線通信齊齊碌，對於記者呢個《塊魂》超級Fans，實在好興奮！可惜會場冇得試玩，只有影片可以睇吓，要玩就要等到12月喇！
推出日期：2005年12月
《MetalGearAcid2》玩立體眼鏡
今年TGS，《MG》系列可算係風頭一時無兩，唔單止喺PS3、PS2，連PSP都有新Game推出。PSP版《MetalGearAcid2》係一部同前作差不多嘅CardGame，除咗加入咗無線通信外，重增設咗PSP遊戲上獨有嘅SOLIDEYETOBIDACID，將佢放喺PSP上面，配合遊戲畫面嘅設計，就可以睇到立體畫面，現場測試效果幾正，不過唔係所有遊戲畫面都對應呢幅立體鏡。
推出日期：2005年12月
《頭文字DStreetStage》Fans必玩
《頭文字D》「鍊」嘅係街車，可以拎出街玩就點都投入感大啲，隻Game玩法其實冇乜特別，不過加入咗二人對戰模式咁，《頭文字D》咁多Fans，隻Game相信都會好受歡迎。
推出日期：2005年12月
《Talkman》PSP口述繙譯
喺SCE攤位度見到一件好特別嘅東西叫做《Talkman》，盒內有一隻UMD同USB咪仔，用法是相當方便的「口述即時繙譯」，對應語言分別有英、日、韓、中（普通話）四國語言互譯，好似香港Game迷都啱用喎！
推出日期：2005年11月
NDSSEGA攤位搶試新Game
PSP有得試玩，NDS都唔輸蝕，雖然任天堂冇參展，不過喺SEGA度一樣見到成群人試新Game，好多重坐晒喺地下，人數比起PSP嗰邊重要多！記者亦都親身試過Download遊戲，喺呢邊一樣因為人太多嘅緣故，間唔中都會出現Error訊息，不過成功試玩嘅人就多好多，而且下載時間亦比PSP短，平均3-5分鐘就Download完一隻Game，真係唔錯！SEGA即場提供有《BB從哪裏來？》及《SonicRush》嘅試玩版同埋《BleachDS》遊戲影片，數量雖然唔多，不過最緊要夠吸引。
《BB從哪裏來？》100隻MiniGame
上集《為你而死》係NDS非常受歡迎嘅遊戲，10月推出新一集，取名《BB從哪裏來？》，一樣採用剪影風格，今次男主角繼續要挑戰唔同嘅MiniGame，嚟討好女主角歡心，不過就加入咗一個第三者嚟從中破壞，MiniGame數目增加至近100個，包你有排玩！
推出日期：2005年10月
《SonicRush》經典回歸
超音鼠現身NDS，講真玩法冇乜新意，而且未能盡用TouchScreen，只係可以用兩個畫面有少少特色；不過遊戲難度更高，而且對一眾超音鼠老Fans，有新作推出已屬難能可貴，始終嗰種速度快感，係其他遊戲畀唔到嘅！
推出日期：2005年11月
《右腦鍛鍊》愈玩愈醒
日本人唔知係咪嫌自己唔夠聰明，好鍾意設計一啲訓練腦筋嘅遊戲，NDS之前都出過《腦鍛鍊》同《頭腦柔軟墊》，嚟緊又新推《右腦鍛鍊》，集中訓練負責記憶、判斷嘅右腦，十分專業，想醒目啲，記住買！
推出日期：2005年11月
TGS花絮
