港股上周在15000大關爭持，恒指全周跌182點，基本上係窄幅整固之局，每日平均成交亦減到150億元。
今個禮拜，頗多大藍籌備兌證到期，計價亦進入高潮，大市何時整固完成，頗大程度視乎大戶的心意，若睇備兌證因素，相信大市真係要「牛」到月底，先有機會發圍。
彩票股曾掀起一陣熱潮，到現時為止，有4家公司「變身」，但前速凌厲，中段有力的，暫時就只有金屬電子交易所（8161）1隻。不過，內地彩票概念係一個新金礦，家吓嘅浪潮亦只係初起，日後「變身」的公司肯定會陸續有來。
講番金交所，呢隻在不足半年內，升幅以數十倍計的神話股，家吓企喺2元以上水平，仍不時見有大行買盤收集。股價急升後，獲利貨雖多，但大行吸納得亦好積極，相信貨源歸邊後，此股有機會再現急升。
中國彩票市場潛力大
中國係世界上第10大的彩票市場，估計05年彩票銷售額將達86億美元，上升80%。由於內地彩票發行由國家控制，目前投資者可進入的業務，只可以係零售或提供營運系統，然後收取佣金收入。
金交所能夠獲得基金垂青，主要係佢同澳洲博彩公司Tabcorp組成嘅合營，同中國福利彩票旗下嘅中福在線簽訂協議，為全國供應彩票機，在集團提供的彩票機中的銷售收益上拆帳，收入可達0.92%。
金交所變身後，8月以先舊後新方式配股，由德意志銀行代理，每股作價1.29元，集資淨額2.71億元，接貨者來頭不小，傳包括摩根大通、富達和新加坡政府旗下的淡馬錫。摩根大通最近有買賣，兩次合共淨增持115萬股。
基金好睇好金交所前景，現水平仍不斷收集，預期股價升幅應會有50%至100%。曾經同芬佬傾過，佢話中國彩票市場雖然會有政策同社會風險的因素，但未來發展嘅潛力又實在係好大，亦好吸引，佢睇金交所應有機會升到4到5元水平。不過，正因風險亦大，所以要訂下止蝕位或上移止賺位方式持有，賺到盡。
郭兆誠