喺陸羽飲完茶出嚟，大道中上，碰到賓架Ｋ，佢話要去中旅社買船飛，於是閒談幾句。知道賓架Ｋ唱歌唱得唔錯，問佢何以唱得咁好？賓架Ｋ話：「我有學過㗎，跟一位Ｌ女士學唱流行曲，識得用丹田之氣，唔少女歌手都跟Ｌ女士學。」點解咁好心機學唱歌呢？原來賓架Ｋ之乖乖女，人靚聲甜，幾年前好想進軍歌壇，走去跟Ｌ女士學藝，賓架Ｋ愛女情切索性跟埋去學，就地睇住。後來發覺，香港懷有歌星夢之人好多，十五歲或以前就跟師傅，賓架Ｋ位千金大學畢業先至開始，遲咗咯，學咗一輪，放棄歌壇夢想，到中環打工，賓架Ｋ於是亦唔再學。
今天父母，培養仔女由細到大，無微不至，出錢出力出時間，不問回報。賓架Ｋ話佢哋銀行聘用大學生，新人入行，做前線人員嘅，好快就要孭quota，其實間間銀行都有類似要求。新仔點樣可以埋到大客身旁呀，孭quota其實孭得幾辛苦。賓架Ｋ話：「總之各師各法，人人各顯神通，你唔使知咁多嘅。」
生性八卦，點都要問清楚。打咗幾個電話，接通咗電子Ｅ。電子Ｅ位乖仔去咗英國八年，讀完大學返嚟，喺銀行做貸款主任。問電子Ｅ：「你位乖仔點樣應付銀行quota？」不問尤自可，一問就觸電。電子Ｅ大大聲講：「做人老竇，有乜辦法，供書教學二十年，𠵱家搵到份銀行工嘞，要周圍搵客，唔通睇住佢俾銀行趕走咩，佢嘅quota變成我嘅quota，我掹咗幾位老友工廠去捧佢場，存錢入銀行，幾個月替佢搵到一億存款。銀行話佢表現超標、超卓，好誇獎佢。真係得啖笑。」唉，電子Ｅ當年邊度有老竇照呀，佢老竇住木屋，搬上公屋，電子Ｅ從無到有，供養父母全靠自己，估唔到現在會「代子從軍」，背後發功！