鬼佬Ｒ買入新款七人車，話二千cc（其實差少少至夠二千cc）已足夠馬力上山頂。上星期，佢個乖仔放假完畢，返英國讀碩士，鬼佬Ｒ載乖仔去機場，本來最快捷妥當嘅方法係送個仔到中環機鐵站，一聲拜拜，個仔二十五分鐘後就可以到達機場，全世界都冇香港咁方便。但鬼佬Ｒ與所有老竇都一樣，係要揸車去到赤鱲角機場，睇住佢checkin先至肯走。做老竇嘅就覺得愛子情切，做仔嘅就覺得老竇好煩，心裏會諗：「我都讀到碩士咯，老竇重要跟出跟入，當我係幼稚園學生咩。」各位父母不妨記住，送大學生兒女去機場，最多送到去機鐵站或者機場巴士站算嘞，無謂浪費時間。
鬼佬Ｒ揸住七人車，自山頂風馳電掣而下，好快就過咗西隧，上到快速公路，咦，車內自動有聲音提示，油缸就快冇油，鬼佬Ｒ心諗捱唔到去機場，不如由貨櫃碼頭附近落葵涌入油，再作打算。一入咗葵涌，佢根本唔知油站喺邊，過咗兩條街，見到有警察設路障，於是特登駛埋去，問一位沙展、兩位警員：「邊度有油站？」點知三位警察阿哥唔識聽英文，講極都唔明，鬼佬Ｒ惟有揮手請警察行埋嚟，指住七人車油錶，猛講：「Petrol?Gasoline?」警察諗咗一輪，對佢講英文：「ChikHuiChuenYau.」鬼佬Ｒ來港多年，識得三四句唔鹹唔淡廣東話，知道佢係講廣東話：「直去轉右。」於是一句多謝，立即開車，弊，直去到邊條街轉右呀？行咗兩條街，不如停車，截咗架的士，搬行李過去，叫司機載乖仔去機場，司機聽見柯打就高興，鬼佬Ｒ問佢：「Gasoline?Petrol?」司機即時用英文回答：「Gostraightturnrightaftertwoblocks.」鬼佬Ｒ好高興，的士司機講英文好過警察，呢勻有救嘞，照指示直去兩條街轉右，見到油站立即飛入去。
油站工人猛揮手叫佢走，鬼佬Ｒ賴死唔走要入油，卒之一個的士司機落車同佢講：「呢個係石油氣站，唔係汽油站！」