部已經講咗兩日XBOX360，大家可能心裏會問，另一部新世代主機PS3又點呀？答案係同E3一樣，維持原判！真機實物一樣未有得摸、亦未有得玩，不過有大量新開發遊戲Video發放，當中最有睇頭者，莫如《MetalGearSolid4》，遊戲畫面，絕對靚仔過睇最新《FF7》UMD電影，令人對PS3加重了一分期待；此外另有一大批PS2各大廠新Game撐場，PS3、PS2兩部主機夾擊下，亦成為了今年TGS熱鬧之地！
記者、攝影：梁瑋瑜
PS3未有新公布
今次TGS，好多傳媒朋友都話希望PS3會有新公布，可惜事與願違，對於硬件規格完全冇新資料；早前網上流傳PS3有硬件規格變動，今次無從進一步證實。問現場Game迷，佢哋都有感PS3特意等XBOX360規格落實後，有再睇住佢嚟打之勢！機身顏色暫時冇變，都係黑、白、銀三色，而且一樣鎖入玻璃飾櫃，有得睇冇得摸。另外，最議論紛紛嘅「香蕉回力鏢」手掣，重係同E3一樣保持原判，不過就多標咗「ConceptualDesign」字樣，明顯將佢降格為「概念設計」手掣，可能SCE吸納咗Game迷意見，有機會重新設計過個手掣！
《MetalGearSolid4》PS3開發機即場示範
論到PS3展區最引人注目者，非《MGS4》莫屬；開發片段足有20分鐘，英俊小生嘅Snake，一開場竟然變成垂垂老矣嘅「老蛇」，感覺已經相當爆！衝擊過後，再留意到畫質，一個沙漠廢墟中，老Snake進行一個潛擊任務，看着地上每顆沙粒及有如頹垣敗瓦的建築物，隨着光源及鏡頭角度作出變化，再加Snake面上一條條鬚根都清晰顯示，而身上衣衫的每一個細節及槍枝武備同樣顯現出強烈質感，在場Game迷無不睇到目瞪口呆！第一個感覺衝上腦海，呢條「CG」片真係重靚過UMDVideo套《FF7》呀！
不過對唔住，小記估錯了！播完整套片後，監製小島秀夫親自現身，這已令在場機迷無比興奮！不過更震撼者，是小島竟然搬出PS3開發機，以證明大家頭先所睇嘅，全是正式遊戲畫面時，嗰種高真實、高流暢同超細緻畫面，可以大膽說是前無古人！有如此強Game力撐，相信《MGS4》將會是PS3遊戲表中，令人期待度最高的大作！
PS3人氣熱Game
《Biohazard5》畫質提升（推出日期：待定）
出到第五代，《Biohazard》系列嘅受歡迎程度毋庸置疑，今集配合PS3推出，畫面上更加有所提升，令到驚嚇程度更高，其他詳細情形仍有待官方公布。
謎之PS3《無雙》（推出日期：待定）
這是一個未有名的CGConceptWork，官方亦冇資料，但睇Koei出品同主角一身打扮，應該係《無雙》系列作品，PS3上面冇番隻《無雙》打吓又點得呢！
滄桑版《機動戰士Gundam》（推出日期：待定）
高達長出長有，PS3都有隻《機動戰士Gundam》，畫面顏色偏淡，畀人一種好滄桑同真實感覺，畫面好細膩，今次走動作路線，應該比較大眾化，大人細路都啱玩。
PS2遊戲新作力抗XBOX360
PS3重係開發階段，只能夠望梅止渴，所以SCE重加推一批PS2新Game；亦唔似得XBOX咁，自公布XBOX360將會推出後，連一隻Game影都冇晒！感覺SCE策略係邊打PS2、邊等PS3，而且重有力抗其他新主機之勢！
《Siren2》角落鬼屋做宣傳推出日期：2006年2月
SCE整個攤位都係工工整整咁擺放遊戲供人試玩，唯獨喺角落有一間灰、紅色小屋，原來係介紹新遊戲《Siren2》；入場人士排晒長龍，裏面設計到成個廢墟咁，不過冇新Game試玩，只係有一段影片畀大家睇，不過已經畀人一種好陰森嘅感覺，比起上一集《Siren》有過之而無不及！
《ROGUEGALAXY》年底頭號勁作 推出日期：2005年12月
陰森嘅遊戲收埋喺攤位一角，而擺正喺門口嘅就係《ROGUEGALAXY》，屬SCE嘅RPG大作，特別處係唔似一般RPG咁過版要等Load碟，成個遊戲十分流暢，而且加插咗勁多靚靚動畫片段，齋睇片都值回票價！人設非常出色，尤其女主角畫得好靚，包保玩得開心！
各大遊戲廠勁Game晒冷
CAPCOM
率先睇PS3《DevilMayCry4》
SCE將會推出PS3版《DevilMayCry4》，早前3代口碑唔錯，第4集搬上PS3，畫質有好大提升，雖然未及《MGS4》咁震撼，不過Game迷都話必玩！
推出日期：待定
機種：PS3
NAMCO
十周年作品《TalesofAbyss》
今年NAMCO同BANDAI聯成一廠，佔地比XBOX360重要大，其中最多人排隊嘅係《TalesofAbyss》，係該系列十周年紀念作，畫面靚、人設Cutie，屬金漆招牌作。
推出日期：2005年12月
機種：PS2
KOMAMI
《MGS3》上網齊齊打
PS3有《MGS4》，PS2呢邊都有隻《MGS3》，首度加入Online功能，支援多人網絡對戰，而且收費全免，令到遊戲更加刺激同埋互動性更高。
推出日期：2005年12月22日
機種：PS2
SQUAREENIX
《KingdomHeartsII》迪士尼撈SE
SQUAREENIX嘅攤檔比較細，一圍滿人，工作人員就不停叫觀眾行前，以免阻塞通道。最搶眼係隻《KingdomHeartsII》，迪士尼人物×SQUAREENIX人物齊齊打怪獸，食正香港迪士尼條水！
推出日期：待定
機種：PS2
TGS會場花絮
TGS首日只接待業內及傳媒都有3萬幾人踩場；到第2日展覽會公開給公眾，入場人數馬上飆升至6、7萬人次，場面更加逼爆！等Game時間明顯長咗好多，差唔多一隻Game都可以等你成粒鐘，好彩大家喺度都睇到所有新Game資料，唔使飛去日本逼咁辛苦。
