民協馮檢基本來帶隊去英國同南愛學人哋點滅貧，不過，佢自己就提早咗三日出發，除咗去母校探訪之外，噚日重喺英國四處尋找恩人。
話說阿基當年去英國讀大學，只係袋住二千鎊就膽粗粗出發，一邊喺百拉福大學讀書，一邊喺唐人餐館打工搵食。佢當時嘅老闆姓張，見佢咁慘，每日落班都俾一袋雞翼同雞腳佢攞走，到佢最後一年冇錢交學費，重借咗二千鎊畀佢，等佢讀完書返香港先至逐個月分期還。
八方問佢點𠱁到張老闆嘅歡心，佢話因為佢勤力喎，老闆封佢做「三不學生」，既不偷錢，不偷煙，亦不偷女人，所以好信任佢。九一年佢參選，呢位長情嘅老闆知佢窮，重叫老婆帶錢畀佢。
所謂知恩圖報，雖然張老闆已經過咗身，阿基再回英國，亦專程去拜訪張太太，可惜摸門釘，原來張太搬到去另一個埠，阿基話有時間重會去搵恩人，八方希望佢哋可以喺中秋團圓啦。
傳真︰2623-9278
電郵︰[email protected]