在溫哥華的夏天，擁有獨立屋的朋友們都喜歡在後花園搞BBQ聚會，輪流每個禮拜搞一次，一個愉快的夏天很快便過去。
真的是風和日麗，大汗淋漓地燒烤的冇癮情景絕不會出現，大家乾乾爽爽地喝着啤酒、餐酒談天說地，看看小朋友在草地上嬉戲滾動。男主外、女主內，男主人操當天生殺大權，大馬金刀地主理燒烤爐，把女主人稱心調製好的大魚大肉當是藝術品般來燒。「厚厚的一件牛扒，為何會又鬆軟又多肉汁，一啲都唔韌，係咪落咗梳打粉？」我一口肉地問。「霎戇！乜嘢都冇落，完全因為嚿肉靚，記住要買Tenderloin，呢個部份嘅肉最啱BBQ，點燒都唔會韌，就算過熱都唔會變柴皮，臨食前隨個人喜好撒些少鹽，真真正正食肉味。」男主人自豪地答道。另一位賓客在吃燒三文魚頭，女友要求咗好耐佢都唔肯讚女友一句皮膚滑，偏偏對住個魚頭係咁大聲讚嘆：「好滑呀！好滑呀！」成條野生三文魚買番嚟切片燒，嗰種鮮味法，養殖場嗰啲完全冇得比。
除了BBQ，女主人會另外準備一大盆沙律及Pasta，沙律醬是自家秘製的，這種醬溝那種醬加些雞蛋最後撒多少咖喱粉，女士們圍在一起研究獨門秘方。賓客們喜歡自家製的沙律醬，女主人面上有光。
除了大吃，還有大喝，各種BC省本地出產的餐酒，女主人為我斟了滿滿的一杯，「最緊要留番一個唔好飲，負責揸車。」女主人說。一位猜輸了的朋友扁扁嘴說：「今日我猜輸咗冇得飲，你哋畀心機飲吧！」無憂無慮，天清氣朗，美酒佳餚，好友一堂，人生幾何？飲勝。