小甜甜龔如心單世紀爭產案峯迴路轉，終審庭嘅判決，肯定係龔如心嘅最佳中秋節禮物，哈，唔知道一向節儉嘅佢會唔會開心到一人送一盒月餅畀華懋啲夥計，或者一人送一個小甜甜公仔？
講番呢單案，表面形勢一直不利小甜甜，而輿論亦似乎傾向唔信佢；八方問知情人士，佢就話小甜甜對手好犀利，好識得利用傳媒造勢；至於小甜甜扭轉敗局嘅關鍵，佢就認為係內地嗰位筆迹專家，呢位專家姓賈，但就真係專家，佢指出遺囑上王德輝個簽名，同佢平日簽名所謂十六點不同之處，其實都係相同嘅。呢一個發現，扭轉咗形勢。
無論點，呢單案已經終審了結，小甜甜保住四百億以上身家，華懋啲樓亦繼續賣。不過，佢細佬龔仁心醫生喺判決前一日遇襲，呢件案睇怕亦會好矚目。
傳真︰2623-9278
電郵︰[email protected]