煲呔上任後真識做，佢破天荒就施政報告諮詢人大同政協意見，更加令人刮目相看。有人諗起老董在任時，見到人大政協都走夾唔唞，就算大家齊齊喺北京開會，老董都好少同佢哋吹水食飯，簡直係要保持距離，相信煲呔唔會步老董嘅後塵。
講真，政改係香港事務，究竟使唔使諮詢人大政協，真係好難講；之不過，人大之一嘅飛哥李鵬飛（圖）就同八方講，去唔去畀意見都無乜所謂，事關佢相信五個功能組別議席畀晒區議會嘅方案，民主派唔會反對，由於無乜意見，所以都無去到。
飛哥下個月要同港台再主持節目，所以佢把握最後輕鬆時機，約咗老友何承天去地中海坐郵輪。但成日同佢結伴遊嘅馬丁，則因為時間上未能配合，唔可以喺今個暑假同飛哥一齊遊埠囉！
傳真︰2623-9278
電郵︰[email protected]