張燊悅和蔡慧敏爭表事件又有新進展，當日在場的設計師洪詠霖力撐張燊悅，指她當時是因為怕蔡慧敏發癲才將兩隻表給了對方，又指對方出席活動時「凸晒個胸出嚟好核突」。蔡慧敏則回敬張燊悅「托得唔夠勁，所以唧唔到」。
張燊悅早前和蔡慧敏在法國品牌Larmescoco鐘表展上發生爭表事件，蔡慧敏事後指張燊悅擅自拿走其價值五萬元的鑽石表，所以追出去要求對方歸還，並說：「如果呢件事上唔係有人理虧，咁使乜交番啲表出嚟呀？」
昨日該品牌的設計師洪詠霖致電記者力撐張燊悅，她說：「張燊悅係我請，佢同我一齊合作其中兩、三款表嘅設計，我哋呢個係高貴典雅嘅場合，佢（蔡慧敏）着到咁、凸晒兩個胸出嚟，又喺度喊又烏低身扮執嘢，我作為designer，真係覺得好tacky（造作）、好核突。」
突然追出來
洪詠霖表示爭表事件發生時，她全程在現場直擊，洪詠霖說：「當時我同張燊悅一齊去攞車，佢（蔡慧敏）突然間走出嚟同我講話『你企喺度』，佢話佢經理人講咗佢有兩隻表，𠵱家得番一隻，叫我哋快啲攞番出嚟。
冇影響合作
「我哋攞咗兩隻表畀佢睇話唔係攞佢嘅，但佢又扯人哋嘅保母落車，又話唔畀我哋走，重拍張燊悅架車嘅玻璃，見到佢情緒咁激動，真係驚佢會發癲，張燊悅話『畀晒佢啦，我唔要啦』，咁咪畀咗兩隻表佢咯。」
洪詠霖又說：「張燊悅幫公司設計，唔好話兩隻表，十隻都會畀佢！呢件事搞成咁我真係好尷尬，因為遲啲會搵佢拍廣告。」而張燊悅昨日則透過紅館經理人Debbie回應說：「我同佢哋嘅合作唔會因為咁而受影響，我都冇為呢件事唔開心，好小事啫！」
身在美國的蔡慧敏昨日知道洪詠霖的指摘後回應說：「佢話我乜嘢核突先？係老闆Athony希望我哋性感啲做宣傳嘅喎，佢兩個夠低胸咯，可能托得唔夠勁，所以唧唔到，話我烏低身扮執嘢？有冇記者影到相？佢咁講我都係唔同佢爭拗咯，我諗佢唔會覺得尷尬，啲人兩頭蛇，唔知想玩乜嘢，我話你聽，我啱啱電話響就係佢打畀我嘅，但佢同我講嘅嘢係兩個版本。」
採訪：張止寒
