小小超李澤楷檔NOW呢排勢頭好就係人都知，但估唔到好運到有人幫佢賣埋廣告上埋封面。話說上個禮拜，有周刊偷拍鄭伊健，話佢響屋企狂煲NOW成人台，圖文並茂介紹埋佢睇乜節目、個台有乜睇，八方啲電視圈朋友講，件事係堅定係流經已唔重要，但至少造就咗兩個贏家──鄭生個舊愛邵美琪同埋NOW！
據聞NOW中人睇到篇報道嗰陣都好驚訝，以為邊個高層出手，又有人聯想到NOW最初開台嗰陣鄭生都做過代言人……但查實，好似乜都唔係，肯定唔關NOW事，其他就要問番睇電視嗰位同埋影人睇電視個位喇！
講開NOW成人台，順便講多單搞笑嘢。先排有「觀眾」向廣管局投訴，話佢哋啲節目格仔太薄太細，重講得出邊時邊日邊個節目「有問題」，幾乎笑死八方。第一，畀咁多錢買幾條成人頻道，目的係為咗唔使拋頭露面去旺角買四仔，就可以欣賞到成人藝術，第二，睇成人電影，唔係投訴個主角唔靚身材唔好，就係嫌套戲冇料到要求回水……格仔太薄？不如買件BURBERRY舖響電視機面先至睇啦！據聞負責審查嗰啲官都唔覺有問題，只係收到投訴就要做野，咁NOW又循例要解吓畫囉。
傳真︰2623-9278
電郵︰[email protected]