鄭欣宜扮白雪公主後，引起罵戰，曾志偉昨日力撐欣宜，叫曾批評欣宜的杜汶澤和欣宜合拍《美女與野獸》，又指杜是譁眾取寵，而杜汶澤則反擊指志偉才是「亂講嘢祖師爺」，志偉認第二自己只敢認第九十九。
鄭欣宜扮白雪公主後收三百多宗投訴，其中一項投訴的原因是指她的扮相「令人不安」，前晚舉行的《星光熠熠耀保良》，介紹李克勤出場時，肥姐沈殿霞說：「每一個歌手都受歡迎同有自己嘅金曲，究竟受歡迎要有乜條件？」一旁的崔建邦說：「唱歌要有潛質，好似欣宜咁。」肥姐即說：「唔好再講啦，令人不安呀。」林曉峰說：「細路女冇罪嘅，不如講吓大人，好似啲男人有喉核、識震音、性格有啲殘酷……」肥姐又說：「殘酷？真係唔好再講嘞，令人不安呀。」事後崔建邦向記者表示自己只是照稿讀。
指阿澤言論過火
另一方面，杜汶澤曾批評欣宜適宜扮小矮人，事後還有網友封他為「人民英雄」，曾志偉昨日在屯門進行月餅義賣，對於杜汶澤的言論，志偉說：「佢（杜汶澤）應該做《美女與野獸》啦！欣宜做美女，佢做野獸。儍佬嚟㗎！細路女都唔放過。」
記者問到志偉可覺得阿澤言論過火，志偉說：「佢不嬲都係咁，佢係秋生個徒弟，成日見報嘅人就會講大路嘢，少見報嘅人咪要有少少譁眾取寵嘅嘢囉！」錢嘉樂亦謂大家不需用太偏激的字眼來批判欣宜，這樣對小女孩好殘忍。
暗寸欣宜多人撐
而杜汶澤昨日則在電話回應說：「其實講到亂講嘢，我又點比得上曾志偉呀，如果佢認第二，我只可以認第九十九，我做電台節目，職業需要我亂講嘢，我係為咗搵食，但佢唔收錢都亂講，佢係為咗興趣，佢係亂講嘢嘅祖師爺，我趁佢唔喺香港先做吓替工啫，佢返咗嚟我邊敢亂講呀。呢排出嚟社會做嘢，我體會出做人最緊要多uncle、auntie，我哋咁畀人話一句兩句邊有咁多人幫，日日打電話畀我要講解，多uncle、auntie大晒咩，早知佢咁多uncle、auntie，我就唔講啦。」
採訪、攝影：王連連、張止寒
