今日中秋節，人月團圓，一家人食完晚飯，齊到空曠地方賞月，食月餅、吃楊桃，當然係人生樂事。
中秋係中國傳統大節，中秋送禮，乃是古風。左丁山覺得，回歸之後，香港送禮之風，日漸復古。中秋節前一個星期，喺中環街頭，見到送果籃上公司嘅情況，多到不可勝數。聽講話中資大企業送禮最豪爽，係文華酒店不可或缺嘅好客戶。
左丁山收到三個果籃，唔係公司送嚟嘅，而係私人朋友，收到都唔好意思。果籃十分重，點拎返屋企呢？於是剪開玻璃紙，攞啲生果出嚟，預備放入膠袋，分批運返屋企。點知拆開一睇，唉吔，唔少生果已經變壞，連橙都壞埋，逐一細數之下，壞生果包括楊桃、提子、橙、士多啤梨……數目有近五成之多，不禁為之火滾，唔係因為冇得食而嬲，而係覺得朋友做咗冤大頭，畀錢送禮，重唔知俾人搵咗笨。
諗諗吓，戥老友好唔抵，橫掂大家咁熟，有嘢唔怕講啫，於是打電話畀艾美麗：「喂，大家咁熟，你送禮畀我做乜？唔怕唔好意思，你送果籃嚟，我好多謝，不過你俾人搵笨，果籃一半生果係爛爛哋嘅……」艾美麗聽到嘩嘩聲，佢好似好多人一樣，打電話去訂貨，叫人送貨，自己都未睇過個果籃，鬼知道啲生果係爛爛哋咩。收禮之人驚住冒犯送禮人，又唔會講番畀送禮人聽啲實況，於是包辦果籃送禮嘅生果店就以為可以收足價錢，送出次貨，賺到笑！一個中秋節，唔知有幾多人收到貴重爛生果而冇出聲呢？
艾美麗唔順氣，打電話去禮品店嘈。至於其他兩位老友送嚟之果籃，壞生果亦不在少數，都無謂再提咯。做生意賺錢係自然不過之事，一個果籃，收得唔會平，啲老闆畀番啲靚生果人哋食，唔會蝕本啩！