無綫力捧小生吳卓羲早前在《兒歌金曲頒獎典禮》上獲沈殿霞（肥姐）愛女鄭欣宜獻吻，影視處竟因此接獲數十宗投訴；其後欣宜扮白雪公主再惹抨擊。欣宜四面楚歌之際，幸有吳卓羲雪中送炭，力撐欣宜無罪也無錯，更說不應該拿她作笑柄。
上月二十七日晚，在無綫的《兒歌金曲頒獎典禮》上，當紮小生吳卓羲與沈殿霞愛女鄭欣宜合演童話劇，飾演王子的吳卓羲勇救欣宜公主後，欣宜在廣大觀眾面前獻上螢幕初吻，令吳卓羲呆了近十秒才定過神來。到節目完畢，欣宜獲母親大人肯首下，順應傳媒「安哥」要求，在後台再咀吳卓羲一次。事後，網友形容這個「世紀之吻」令人非常震驚，但更驚訝的是，影視處接獲八十一宗投訴。
讚拍檔工作投入
本月初吳卓羲去了南京拍攝新劇《亂世佳人》，而欣宜在「世紀之吻」後，再因在迪士尼節目中扮白雪公主，而令影視處接獲三百多宗投訴，身在南京的他聽到這個消息，即力撐欣宜，那種雪中送炭的溫暖，相信必令她甜入心。
日前吳卓羲透過長途電話說：「根本就唔係有啲乜嘢，欣宜係一個好勤力嘅人，唱歌、跳舞OK，嗰次（《兒歌頒獎禮》）我見佢排舞好投入、好努力，工作態度好好，同埋佢比之前瘦咗好多，你哋知唔知減肥係一件好辛苦嘅事嚟㗎？唔應該取笑欣宜，唔應該再話佢，佢又冇罪，又冇做錯啲乜嘢。」
吳卓羲續說：「其實嗰日錫，我唔係反應大，係drama（戲劇）嚟㗎，事後記者問可唔可以再錫一次？我話要問過肥姐先，肥姐話OK，男仔實肯，有女仔錫梗係開心。綵排時啲記者都知道有個位要錫，唔係突然間錫㗎。」在合作演出前，吳卓羲從沒與欣宜見過面，經過合作後，他心目中的欣宜會是這樣的：「我覺得佢好勤力，好有舞台天份，同佢傾偈，佢好大方，講嘢有紋有路。嗰次合作之後，大家冇聯絡，但佢有同我講，話作咗啲歌會畀我聽吓㖭，欣宜有佢嘅味道嘅。」
對於欣宜扮白雪公主招惹數百投訴，吳卓羲說：「我都想同佢講，唔使為呢啲事唔開心，係咪？做好啲嘢，總會有人欣賞。」
不擔心fans呷醋
問吳卓羲他日再遇欣宜會否慰問對方，他說：「會，會傾吓，唔係因為佢係肥姐個女，而佢事實係一個好有心做嘢嘅人。」不過欣宜初踏星途已碰沙石，將來的路也許更難走，吳卓羲則另有一番見解，他說：「但會有啲幫助，一嚟就遇到一啲唔開心嘅事，第日有啲乜都會容易面對。」再問欣宜是否適合當藝人？他說：「OK㗎，最重要係佢有個心。」
吳卓羲還說，不抗拒與欣宜再合作，也不擔心fans不喜歡，他說：「怕乜啫？唔怕！佢哋會明白我嘅工作。」
撰文：朱倬誼
攝影：林德雄
化妝：IanWong@KenQi
髮型：MayAkehurstdeVisme
場地：CafeColorado
