吳卓羲的緋聞不算太多，傳來傳去都是官恩娜與楊怡，但一講楊怡，他不假思索便斬釘截鐵說：「同佢冇可能，noway！佢係一個男仔頭，未出道時已經識啦，識咗成七年，要開始一早開始咗啦，我拍拖係要一開始就要有feel嗰啲人，佢係我欣賞嘅朋友咋。」至於官恩娜，他同樣說只是拍檔，沒有擦出愛火花。
冇時間培養感情
反而吳卓羲自爆有朋友為他拉紅線，介紹女仔給他認識，但到頭來也是得個桔，他笑說：「試過見到有啲有好感嘅，但識落又唔係嗰回事，加上拍拖就要追人，我驚食檸檬呀！到追到又冇時間陪人，所以我都唔係好主動，除非遇到好心儀嘅對象。」
吳卓羲還說：「工作上已經令到我個人好dry，我係一個好慢熱嘅人，要用時間培養感情，既然冇時間，𠵱家又未有想戀愛嘅心，未遇到就不如勤力工作，事業有成嘅話，唔愁冇女仔嘅。」
是非篇：感激婆婆罵乞人憎
近一年來，吳卓羲備受無綫力捧，拍劇、唱歌、演出機會多不勝數，令其名氣隨之躍升，但是非也緊接而來，吳卓羲隨口都講得出大堆新「綽號」，認真識自嘲。
言者無心聽者有意
屢被形容為扮大哥的吳卓羲，較早前在尖沙嘴接受訪問時，提起這些稱號不禁苦笑說：「乜嘢係大哥呢？以前重慘，出道時木口木面，問一句就答一句半句，當時都唔識得表達自己，今日做訪問都識得點對答，點解以前唔講，𠵱家至攞嚟講？」
是因為竄紅了的關係嗎？吳卓羲即搖頭說：「你哋話啫，識得我嘅朋友知我係乜嘢人，𠵱家講嘢唯有小心啲，可能講咗啲說話無心，人哋聽落有意，俾人哋誤會咗，乜嘢扮cool、扮型、扮大哥、驕傲、叫羲哥、電視城霸王，唔講嘢都有呢啲事發生，有時講啲嘢冇乜特別意思，但都會惹人誤會，唯有盡量學識笑笑口、點點頭啦。」
演技不足勤力搭夠
無綫近期正播映吳卓羲主演的《酒店風雲》，劇中他飾演亦正亦邪的王啟傑，角色頗有發揮空間，只是以他的演技及經驗而言，是否已夠班孭飛？
吳卓羲就略有保留地說：「唔知，公司策略，公司畀我做梗係開心，自己盡量做好，重口靚仔，有一日要用勤力畀大家睇到我係得嘅！但有fans話今次嘅演出比以前有進步，試過喺街度有啲婆婆話：『你個角色咁乞人憎㗎！』，我好多謝個婆婆，因為我乞人憎終於有人認同。」
