應屆港姐當選後立即馬不停蹄履行職務，她們本希望今個中秋節能與家人團圓，但因工作纏身，大家惟有提前慶祝。最愛吃月餅蛋黃的葉翠翠自爆曾吃蛋黃過多腸胃不適，如今成為港姐冠軍，她決定今個中秋以水果代替月餅，以保持體態，備戰華姐。
應屆三位港姐冠軍葉翠翠、亞軍陸詩韻和季軍林莉當選後首度過中秋節，但三人均要在佳節開工，唯有提前與家人吃飯慶中秋。過時過節對於以前任職空姐的陸詩韻而言相當陌生，她說：「通常節日我都要返工，會喺空中同同事以及旅客度過，原本都以為今個中秋有機會同屋企人一齊，但因為要工作，已經提早同屋企人食咗飯。」
戒月餅保苗條
冠軍葉翠翠雖然在外國留學，但團圓日子總會返香港與家人共聚，而中秋節葉翠翠就最愛吃傳統月餅，尤其是蛋黃，陸詩韻則獨愛蓮蓉，二人可以各取所需。
葉翠翠更自爆試過食月餅導致腸胃不適，但如今成為港姐後，為免發胖，葉翠翠決定以水果代替月餅，她說：「其實食月餅好肥㗎，為咗保持最佳狀態，唔敢狂食要戒吓口，因為嚟緊年尾要參選華裔小姐。」
工作忙難拍拖
葉翠翠的童年可謂十分幸福，可以與兄弟姐妹齊齊玩燈籠，相反林莉的中秋卻有慘痛的回憶，她說：「記得中秋節有傳統兔仔燈籠玩，但一陣就燒咗，記得自己喊咗好耐，但𠵱家就唔同，好多燈籠都係用燈膽，絕對唔會好似我哋以前咁。」
三位港姐自參選直至當選後，因要拍外景及履行港姐任務，均與家人聚少離多，故在中秋人月團圓的日子，特別盼望與家人共度，至於在團圓的節日，會否渴望盡快找到如意郎君浪漫一番，葉翠翠則說：「我哋𠵱家咁忙，都冇為意身邊有冇合適男仔啦，拍拖都係遲的先講。」而陸詩韻和林莉亦表示不急於拍拖。
採訪：卓寶花 攝影：葉君海
服裝：Mi-Tu 化妝：FungYukChing（TVB） 髮型：HAIR（又一城）
