阿媽成日喺耳邊𠵱𠵱哦哦話食飯盒冇益，所以平日極少吃飯盒。大部份食飯盒嘅日子都係開工拍電影嘅時候。即係見到飯盒等於係開緊工。
以往做副導演日子對飯盒冇乜特別要求，最緊要快，因為副導演其實食飯都冇時間，食飯時間往往係副導演同其他部門溝通嘅最好時機，有時問吓導演聽日想點？有時就同道具講吓後日啲嘢，更大部份時間都係同製片部門嘅同事核對明天嘅拍攝通告。所以食咗乜根本唔知，亦都唔重要。
其他部門嘅同事就完全唔同，開工飯盒對某啲人真係好緊要，梳頭、化裝啲阿姐最多時間，有時飯盒到咗會見佢哋逐個打開，由頭揀到尾，目的都係揀個啱食嘅飯盒。燈光機器組體力勞動最大，最好食兩個。做導演通常都唔食，因為拍戲都拍到嘔，睇怕都冇乜胃口食。有啲演員就會有specialorder，即係叫劇務買佢哋鍾意食嘅嘢。
劇務負責訂飯買飯，照顧大家飲食，有啲劇務好有創意，餐餐唔同，天天新款。有啲就好懶，日日一樣，一定係「打斧頭」。不過大部份員工一見到啲俗稱「死雞死鴨飯」即係燒味飯就會媽媽聲，我都唔知點解。
最近兩年都在外地拍戲，各處地方嘅飲食習慣不同，日本拍戲每餐都係食飯盒，不過係凍嘅。我問製片佢話日本人傳統係鍾意食凍飯盒。食咗一個月後大家見到個飯盒都冇反應。我有一日問工作人員掛唔掛住啲「死雞死鴨飯」？大家一聽到就流口水。