提早離職嘅醫管局行政總裁何兆煒，周二起正式離職，佢噚日同班醫療新聞記者餞別時，大談六年嚟服侍過嘅四名醫管局主席。
首先係吳光正，佢話吳光正好有經驗，教曉佢唔少嘢，「我哋喺office（辦公室），我一碟飯、佢一碟飯，邊食邊做」；跟住嘅羅嘉瑞，佢話羅性子急，有報告畀佢，好快就可以有決定。
至於之後嘅梁智鴻，佢話梁智鴻做過好多醫療職位，所以○二年佢染咗沙士時，梁幫佢做埋啲工作；至於𠵱家嘅主席胡定旭，佢話呢位老細講求萬事以和為貴，好關注員工士氣。
何兆煒會改任醫管局新界東聯網嘅顧問醫生（社會醫學），人工由以前每年薪酬約四百萬蚊，大減至首長級D4，比之前少約一半，新上司係佢以前嘅下屬、新界東聯網總監馮康。佢周二會飛去美國哈佛公共醫療學院進修三個月先，年底先返嚟同新行政總裁交接。
爆料熱線：29290000、27860099
報料傳真：26239278
報料電郵：[email protected]