座駕對得耐嫌色齋，有無諗過度身訂做噴油裝身？今次介紹呢位殿堂級車身噴畫師傅大坑輝，七、八十年代已開始其噴畫工作，但作品造型一啲都唔Out，由錢家樂以至香港車手李英健等都搵佢噴花，最重要係顏色、圖案都由你話事，而且最快可以30分鐘幫你部愛駒極速變身，睇厭咗，重可以起油再噴都得，同場加映另一位噴油新進，一樣咁有睇頭！
記者：戴維浩
攝影：陳陶鈞
模特兒：Annabelle
Graffiti先驅
香港車身噴畫名人不得不提「大坑輝」（因輝哥之前於港島大坑區開舖），名人商賈，車手如呂米高、「盲亨」等喚他「神童」，小記如我稱他一句「輝哥」都得。輝哥噴花噴油30年，七、八十年代就開始為瑞興（老牌百貨集團）噴櫥窗裝飾，香港人未玩Graffiti之前，他已經噴牆噴車，噴油拉花車種由Kart、3級方程式等各式賽車都有，另加戰衣頭盔無數，至今車手如李英健、詹家圖，另有港隊單車好手黃金寶都幫襯輝哥，甚至連最近《頭文字D》余文樂為首的車隊共12件戰衣，Logo都係輝哥設計同操刀。
必先打電話預約
舉目所見400多平方呎嘅CycleGraphicArt舖面內放滿油漆、頭盔、車身零件、舊日本、美國雜誌，非常凌亂，施工、陳列一腳踢，但他工作不獨於斗室內，白天大多數外出進行工程，晚上才回檔口趕工，早上想落「柯打」，必先以電話接洽，要不然拿來紙樣草圖，極有可能摸門釘收場。
「我乜都噴！」
汽車至電單車，大大小小日常用品，只要係平面，物主有要求，而其草案又合理可行，輝哥都會一應所求。
「你畀雪櫃、廁所板我都會照噴！」
工程小至背囊、T-恤噴花，至大型招牌裝修都有。80年代Disco興盛時，輝哥有做場內噴畫裝修，題材可以係「實則虛之，虛則實之」，曾試過於舞池附近噴一條隧道。
「啲友仔揩過草嘅就以為真係有條隧道，見前面有光就撼頭埋牆，咁樣整蠱人，真係好過癮！」
30分鐘噴畫 即場示範
講多無謂，行動實際，筆者要求輝哥露兩手，定風翼手到拿來，他作畫可以隨興之所至，由起稿、填色、玩效果，30分鐘內起貨現真章，筆者與攝影師都嘖嘖稱奇。其間落油、稀釋，作品浪漫隨意。
記者：「乜唔係要起稿同落遮色紙嘅咩？」
輝哥：「唔使！」，即時落「槍」。
輝哥舊作
現成作品：圖案花巧夠平滑
價目表
單車、電單車：$2,000至$4,000起
私家車：$4,000至$5,000起
（如有來件，要起底油、修補上灰打磨，另加$800）
CycleGraphicArt
地址：土瓜灣環順街20號（崇安街後面）
電話：98101018
富仔講求線條美
如果說輝哥畫作代表狂放、浪漫，那麼於土瓜灣開檔的富仔，可以理解為工整及講究線條美。富仔雖為後起之秀，但亦有10多年噴油經驗，只做電單車噴花，作畫認真一絲不苟，招牌作品「龍之花」，作品複雜歷時近一個月完成。來件好壞都得，連上灰加打磨，最後噴花打磨都包埋，價錢多少？確係海鮮價，視乎車花複雜及車身大小而定。
即場示範飛機「啡呤」
作品集：龍之花做生招牌
價錢：視乎難度而定，右列飛機式噴油盛惠$5,000。
專業噴油
預約電話：96484986
車身噴油要申報
若果車身噴油?畫大幅畫掩蓋原有車身顏色，便必須填妥運輸署TD559表格（更改個人資料或車輛資料通知書），有關表格可於運輸署網頁（ http://www.td.gov.hk/public_forms/td_forms/vehicle_registration_and_licence/index_tc.htm）下載，並以書面形式，72小時內郵遞或親身交表，向運輸署申報車身更改顏色。切記，車身絕對不可以有數字，亦不可模仿政府或公共車輛。