杜汶澤和內地女星高圓圓等前晚在上海為美國時裝品牌TommyHilfiger行騷，身高五呎六吋的阿澤，笑言拜黎明所賜暴肥至一百六十磅，故被邀請行騷時，以為是街頭騙案。
美國名牌TommyHilfiger剛在紐約發表全新○六春夏系列，創辦人TommyHilfiger隨即展開亞洲巡迴之旅，前晚在上海揭開首站時裝騷，今日會抵香港，之後再轉到日本及韓國。
前晚大會請來二十八位模特兒示範新裝，更特別請來杜汶澤及在康城獲得最佳評審獎、電影《青紅》女主角高圓圓行騷，增磅不少的杜汶澤穿上百慕達短褲赤腳行騷，他說：「佢哋話要我同埋成六呎高嘅內地模特兒行騷，重以為係街頭騙案，後來先知真有其事。」
早餐吞三漢堡
阿澤坦言上台信心十足，他說：「幾開心，佢哋揀咗我好耐，我代表加大碼，不過我真係肥咗好多，五呎六吋高有一百六十磅，因為早排同黎明喺日本拍《情義兩心知》，同佢一齊狂食炸物、拉麵，又學佢食三個漢堡包做早餐，搞到𠵱家肥咗，總膽固醇超標，要開始戒口，蛋治、打邊爐，乜都唔食得，賭又戒埋，婚又結埋，冇得去滾，又唔吸毒，真係冇晒人生樂趣！」
阿澤早前在電台大彈欣宜，問他有否給肥姐鬧？阿澤說：「節目嘅內容除咗我，只有電台有資格管理，我做節目主持，有自己嘅立場，對得住聽眾就得。作為負責任嘅員工，我只需要向自己嘅工作負責。」而奧運體操金牌得主劉璇亦有到場睇騷，她透露會客串拍攝一部慈善電影，為內地兒童籌款。
增添陽光活力
今季TommyHilfiger再次以擅長的美式清新風格為主題，爽朗的短褲、恤衫、polo衣配短裙，及線條利落的連身裙，活力十足，色彩亦充滿一片陽光氣息，如火紅、天藍、純白和檸檬黃等，圖案則以簡約青春的格仔及條子為主。
記者DebbieLum、RickyIp上海直擊
