新世界中國（917）上星期五喺祖國房地產股起哄下，畀反應升咗3格，呢劑反應畀得好，有得諗。
新中今年2月2供3，每股伸手價2.8元，集資63億銀，連同新中去年底手頭現金29億銀，新中現金應該高達92億銀，減晒60億銀貸，淨現金差唔多32億銀，現金底厚。況且新中現價2.55元，相對最新NAV6蚊折讓近58%，打大風都無有怕。
又呢期所見，好多港資超級大孖沙北上積極囤積土儲，好相信大孖沙中線除咗靠本土搵餐晏，更加想依重祖國食大茶飯，所以，呢勻新中阿媽新世界（017）自己賣港產樓都掂檔，但長遠少少睇，最有可能係靠新中發圍。
新中早年已經投資祖國，手頭物業土儲講緊1720萬平方米，拋離行家九條街，除非唔想做嘢，否則，呢隻股應該有好大發揮空間。新中上星期五微升，已經貼喺年頭以嚟下降軌，若連帶7、8月橫行頂2.675元都突破埋，確認扶搖直上。
丹楓具另類復甦概念
丹楓（271）對上星期五，係咁易成交一球貨，係個半月嚟最多一日，又講兩點：第一，上星期五小甜甜單case得直，系內安寧控股（128）應聲彈出，查實小甜甜亦揸住丹楓23%，而兩隻股靜咗咁耐，一樣有好多待發掘潛質，具備另類「復甦」概念。第二，安寧嚟緊星期五（23號）先公布05年中期業績，重有業績呢關要過，丹楓喺對上星期二先派完同期成績表，純利球半嘢，唔講得上多，但過咗關，暫時冇乜後顧之憂。
丹楓最新NAV近1.34元，現價0.41元相對折讓近70%，折讓唔嘢少，昅昅無妨。
錢雋