外圍市況冇方向，港股適逢中秋佳節長周末，下周二復市又要面對美國可能加息，投資者當然無心戀戰，恒指失守15000，收報14983，跌57點，成交145.31億元。
噚日市場焦點集中在澳門概念股身上，投資者關注滙業銀行被美國指幫北韓洗黑錢一事，會否對澳門概念股有影響？結果新濠（200）跌2.5%至9.70元，信德（242）升2.38%至6.45元，嘉華建材（027）跌0.92%，表現尚算個別，跌勢唔算全面。不過，午後澳門滙業銀行出現人龍提款，金管局派畢馬威管理香港的滙業信貸，證監會又派員進駐滙業證券，看來事態發展得比想像中嚴重。
新地（016）業績靚兼派高息，但大行唔睇好，投資者不受息誘，結果股價低見79.75元，最後挫1.9%，收報80元，成交達8.18億元。若睇成交量，似有基金出貨。大行主要是因為新地放緩推出樓盤，憂慮新地未來兩三年的盈利表現未如理想。不過，新地管理層就堅持延遲推出樓盤，將可獲更高利潤。阿虎聽落各有理據，但錢在基金手，一旦基金都睇淡，新地股價自然遭殃。
中華網又傳私有化
中華網（8006）股價噚日急升19.64%至0.67元，成交達6041萬元。市場又再舊聞新炒，再傳隻股私有化。不過黑客就話，私有化就未必，但如果中華網真係到海外知名市場（好大機會是Nasdaq）上市，到時股價可能會炒得好高。大上大落是Nasdaq網股的特徵，中華網都係時候練習一下。
阿虎