濠江有間金融機構被美國佬抽秤，搞到存戶排隊去佢哋銀行提錢咁大件事，本港個別澳門概念股亦都受到影響，好似小賭王隻新濠（200）原本好好哋，噚日亦一度跌至9.40元，好彩最後彈番上9.70元收市，只跌2.5％，至於10送1嘉建（027）的嘉華國際（173）亦跌4.4％，收2.70元。
經紀陳話，有陰謀論者話今次係美國佬玩嘢，但現時風頭火勢，澳門股暫時唞一唞比較穩陣。
雖然係咁，大陸彩票股就繼續各自精采，例如已經啟程去花旗國做路演的金屬電子交易所（8161），昨日股價升2.38％，收2.15元，成交股數1400萬股，金額2963萬元。
至於一直好勤力搞投資者關係嘅看通集團（1059），昨日更勁升12.86％，收0.79元，成交股數3512萬股，金額2670萬元。
經紀黃話，自從看通話參與大陸彩票生意以來，股價炒上炒落好波動，而有關看通批股集資的傳聞則一直揮之不去，昨日股價突然急升，難怪批股傳聞又再出現。
慕容小初