章子怡自從《臥虎藏龍》後成為咗國際級知名女星，身價自然暴漲唔少，噚日就有內地報章指章子怡喺兩年前一次過豪擲二百幾萬人民幣，喺北京老家朝陽區英特公寓買入一間有一百八十六平方米大嘅高級豪宅同家人同住，認真孝順！而呢棟公寓位於朝陽嘅高級住宅區內，同王菲所住嘅嘉林花園同屬一區，環境就符合晒章子怡嘅身份象徵。