本報記者東京直擊TGS2005
全城Game迷期待嘅東京遊戲展（TokyoGameShow2005）噚日（16號）喺日本幕張正式開鑼，開Show之前一日，XBOX360喺涉谷舉行咗一個發布會，爆出機價同發售日期；美、歐、日三地將於年底11、12月先後推出，當中最具指導作用嘅係日本區連硬碟版嘅XBOX360，現已定價為37,900日圓（約港幣$2,800），至於香港到機情況，預計明年初大家亦可以有機玩，再加上進一步落實好多猛Game嘅到貨時間，XBOX360實在令人萬分期待！
記者、攝影：梁瑋瑜
XBOX360定價貴唔貴？
其實未開發布會前，大家都大概知道XBOX360嘅售價，不過到正式公布後，聽到$399美元呢個價錢，好多Gamer都受到一定衝擊，覺得幾貴吓！翻查上一代「次世代主機」嘅開售價，PS2在2000年推出、XBOX則在2001年推出，開售定價同為299美元(約港幣$2,332)，相對XBOX360，足足貴咗5嚿水，加上又貼近$3,000心理關口，感覺偏貴；不過XBOX360功能同規格都實在作出大幅度提升，內置硬碟機、有WLAN，兼有720p（16:9）及5.1聲道等高質聲畫輸出，貴定唔貴賣，睇你點睇！
香港行貨06年頭推出
今年嘅E3，XBOX360早已經亮過相，今次記者會上，XBOX事務本部長丸山嘉浩公布咗大家引頸以待嘅發售日期同售價；全球率先推出嘅地區，係美國總壇！預計發售日期為11月22日；其後緊接12月2日，歐洲地區都會有得賣；至於今次XBOX360主力進攻嘅日本市場，亦會喺12月10日開始發售。香港行貨方面，XBOX360可能做唔切大家嘅聖誕禮物喇！預計明年初到貨！心急嘅香港玩家，睇怕又要被無良嘅水貨商「炒高」嚟賣！其實時間只係相差個零月，奉勸大家忍一忍手，等行貨啦！
正如一直公布所講，XBOX360一樣會分為「有HDD版」及「冇HDD齋版」，據知日本發售嘅XBOX360會全部內置20GB硬碟，連同無線手掣及MediaCenter遙控器，不過美國區玩家就可以選擇內置硬碟及無內置硬碟兩款。丸山嘉浩表示，咁嘅安排係因為日本地區寬頻覆蓋十分廣泛，廠方已經預設咗好多需要用硬碟嚟下載嘅網上內容畀玩家，而其他地區則要更富彈性。
至於售價方面，暫時只公布了內置硬碟機版本的售價；日本區售價為37,900日圓（約港幣$2,800），美國嘅售價則為399美元（約港幣$3,112），兩個價錢比較下，日本機好似抵玩啲喎！
重頭作畫面率先睇
講完主機，大家當然想知有乜嘢Game玩啦，其實好幾部大作都已經製作得如火如荼，記者會當日重有作品影片發布，其中以《NinetyNineNights》及《GearofWars》最為矚目。另外，喺今年11月，XBOX360會喺東京青山區開設「XBOX360Lounge」Showroom，設計好簡潔同高科技，裏面可以試玩最新XBOX360遊戲，相信會成為XBOXFans日後必到嘅朝聖地！
XBOX360版三國無雙
《NinetyNineNights》由微軟及EpicGames共同開發，玩法與《真．三國無雙》十分相似，都係大規模殺敵遊戲，不過萬馬千軍嘅場面比《無雙》更加氣勢磅礡，而且死者嘅屍體係唔會消失，成地屍體嘅畫面令到遊戲更加有真實感。
老牌Game新打法
《天外魔境》最早喺PC-ENGINE上推出，這次走上XBOX360，將會係佢首款東洋風嘅RPG作品，系統從簡單指令回合制，革新為自動戰鬥系統，戰鬥畫面超華麗。
靚版勁立體《R6》
《GearofWars》係第三身射擊遊戲，打法好似《R6》，現場所見畫面立體感比以往PC版及家用機版真係高出好多，加上畫面勁流暢，射擊Game迷要留意。
睇新機試新Game
XBOX360展區逼爆
噚朝係TGS2005的首日展覽，雖然早上10時先正式揭幕，但見早上8時多，已經開始出現排隊人龍！TGS首日基本只會接待傳媒，會場亦一如以往在海濱幕張舉行，場區大小亦唔見有好大加減，不過可能參展公司多了，再加上世界各地記者都為一睹新世代主機的風采，會場所見真係人頭湧湧！
數最熱鬧的展區，真係非XBOX360莫屬，因為全個會場唯一得佢有「真機」落場，同新Game試玩；相對其他新主機生產商，重係用玻璃箱包住部主機，遊戲畫面都重係重複翻播Video，XBOX360當然吸引好多！XBOX360嘅攤檔布置好別出心裁，搞到成個屋企客廳咁，可能希望玩家有親身體驗屋企有部XBOX360嘅滋味，無論打機、聽歌定睇戲，一部XBOX360幫你搞掂晒。
80部真機任試任玩
現場所見，大概有成80部XBOX360放滿展區任人試任人玩！至於攞出嚟供人試玩的遊戲，亦有15、16款之多！當中最多傳媒人士爭住玩嘅，首推係《NinetyNineNights》，玩過嘅都手指一竪，話佢畫面正又夠順暢！至於另一話題焦點，當然係SQUAREENIX首度登陸XBOX嘅《FinalFantasyXI》，而且重特別闢咗個體驗Corner，畀大家率先試吓XBOX360畫面有幾靚！想知道更加多關於XBOX360同TGS最新遊戲，記住留意《蘋果日報》之後幾日嘅報道喇。
XBOX360勁作遊戲時間表
日本人眼中XBOX360
任天堂Revolution遙控手掣現身
睇住幾部新主機喺TGS有更多資料公布，一向唔參加TGS嘅任天堂當然唔想失威，終於將一直唔肯公布嘅手掣曝光！Revolution主機手掣一直被視為秘密，外界都估到任天堂一定有新搞作，不出所料，今次睇到嘅手掣外形一改機迷對手掣嘅印象，就好似電視遙控一樣，基本上只要一隻手就可操作。手掣特別之處，相信係用上光線槍嘅原理，可以感應電視畫面圖像位置，直接用手掣就可以點選畫面內嘅圖像，各位可以預期將來玩《Biohazard》一類遊戲，可以直接用手掣打開封箱或查看物件，完全係一個新體驗！另外，手掣亦具備感應器，可偵測手掣移動，機迷揸住手掣就可直接做斬擊嘅動作。當手掣打橫放，又可當作傳統手掣咁玩，亦可外接一個3D操作器，適合玩好多唔同類型遊戲。一句講晒，始終係任天堂最具創意，見到個手掣，當堂對Revolution期望度高咗幾倍！
記者：許福合