上期提及第九屆香港冠軍貓展，小孫女不敵爺爺，搞到「嬲爆爆」與爺爺嘈交。睇番同日在香港會議展覽中心舉行、由香港狗會主辦的「2005年度優卡盃狗展」，賽果就剛剛相反，西施犬Dreamer首度擊敗爸爸Tucker，摘下桂冠之餘，下年更會代表香港遠赴美國參賽。
記者：邵超
攝影：林栢鈞
每個成功男人背後，都有一個女人；Dreamer主人伍德仁的背後，就有好多西施犬。當年他第一次遇見西施，連牠出身何處、甚麼品種都不知道的情況下，就重金買下牠。由乜都唔曉，慢慢發展至成為本地西施犬繁殖家，過程都幾曲折離奇。今次我哋進入Dreamer的閨房，大爆今屆冠軍犬的私生活。
20年前的緣份
阿仁帶西施犬參賽好似命中注定，他與第一頭西施犬於20年前結緣，當時寵物店已經幫牠報名參加狗展。他接手第二個星期，已經帶着那頭西施犬參賽並且有獎攞，對於新手來說，好似發緊夢。「最初唔識點Keep一隻西施，每日梳毛起碼用四小時，後來慢慢研究至似樣啲。」由第一隻西施犬開始，阿仁跟寵物界的淵源愈來愈深，其中一個繁殖家更鼓勵他創業，專心做繁殖的工作。終於，阿仁放棄了十年的警察生涯，現時已是三間寵物用品護理店的老闆，與拍檔經營RoyalstarKennel。
搭慣飛機的狗
據阿仁講，一般大型狗到七歲就叫老狗，而運動量足的小型狗到十歲都唔怕遲，重有機會喺狗展中攞獎。伍家有仔初長成，年尾就四歲的Dreamer正值一頭西施犬的黃金ShowTime（2至5歲）；爸爸Tucker亦一啲都唔老，五歲仔咋！Tucker在2002年參賽儲埋嘅積分已經攀至全美西施的第二位，靚成咁，Dreamer完全承襲了爸爸的美貌，早在出生地美國亦攞過狗展冠軍至返港同爸爸團聚。「Tucker和Dreamer搭慣飛機，每逢有重要比賽，我就會空運牠們去美國，託當地相熟的Handler帶牠們出賽。𠵱家日日要打理Tucker和牠的子女，根本行唔開，下年Dreamer代表香港出賽『全美優卡盃』，我都係要託朋友帶。」
扮靚時間
狗展當日Tucker和Dreamer豔冠全場，梳晒高髻，披毛成件拖尾晚禮服又長又滑，原來都係平日日子有功。阿仁話：「香港人養西施犬都會嫌麻煩剪短晒，但ShowDog就唔可以咁。因為牠們披毛太長，日日要同牠們梳毛同紮辮、住獨立籠，唔可以俾佢哋亂咁郁或者與其他狗一齊玩。」嘩，咪慘過坐監！「Dreamer由細到大好貪靚，好清楚自己係靚仔，唔使教佢都唔會亂咁郁。反而Tucker有時都幾唔定性，打理時要好小心。」
冠軍狗Gym
「香港人養狗講潮流，一時興小Q，一時興玩具貴婦犬，養西施好易畀人話Out。但可以養到牠們由短毛變長毛都唔折斷，冷氣同濕度都要控制得好，挑戰性好大，好有滿足感。」為咗靚，阿仁在美容和營養方面都有晒全盤計劃：每日日程包括梳毛、做跑步機練肌肉，食物只吃乾糧，由阿仁親自餵食再抹嘴，睇住牠們咬一陣骨當刷牙，有需要時就用牙Gel刷牙。「比賽前後都要忙一輪，護理方法都唔同，平時沖涼會落護毛液，出賽前就要洗甩油脂。牠們好享受呢段美容的時光，唔使陪牠們玩已經好開心。」
請埋狗保鑣
鍾意動物的人某程度都有病，鍾意係咁買或者係咁執，阿仁都笑自己有病：除咗有Tucker一家四口，另外又養咗五隻貓玩吓，返到屋企又要陪四大四小的後宮佳麗（包括「退役」西施），最厲害係幫牠們請保鑣。「無辦法，我特別鍾意扁臉的動物，所以喺荷蘭入咗一對Bouvies（牧羊犬一種），始終住村屋都要養大狗看門口。」
阿仁揹住咁重的家庭負擔，多年來一直未試過亦唔會諗住出遠門，每次旅行最多都係兩至三日的旅程，犧牲真係大。「鍾意又點會覺得犧牲，去旅行反而係犧牲我見狗的時間。」阿仁呢種理所當然的諗法，相信唔養狗的人係一世都唔會理解。
