中秋長假前，氣氛麻麻，恒指跌57點。通常長假前股市唔係咁好，理由係炒家唔想揸太多貨，以免唔知美股假期內有乜變化，心掛掛。是日新地（016）成為拖低大市主角，收80元，跌1.90元，拖低恒指11.8點。
新地P輪4902：新地下跌，新地P輪自然掂檔，有成交嘅5隻P輪，升幅由16%至27%，升得最多嘅係4902，埋單價20.7仙，成交金額690萬元。隻輪今年12月上旬夠鐘，溢價6.5%，槓桿率38.7倍（有效14.2倍），引伸波幅20.3%。到期前，正股派息1.50元，隻輪實際溢價要減番1.9個百分點。
新地P輪9422：9422係升得最小嘅新地P輪，收42.5仙，升幅16%，同時亦係最熱門嗰隻，成交金額超過1千萬元。隻輪明年3月初夠鐘，溢價7.8%，槓桿率18.8倍（有效7.8倍），引伸波幅24.2%。如果睇淡新地，揀P輪炒，9422比較4902更值得諗，雖然槓桿率冇咁勁，但喺壽命與溢價方面着番數。不過，新地唔會咁孱，到咁上下反彈，揸乜P輪都會輸。與其高追P輪，不如等新地進一步回軟時，低買C輪。
神華C輪：神華（1088）再跌15仙，C輪跟埋跌。咪貪平兜貨，除咗驚正股冇氣之外，睇吓溢價（最高43%）與有效槓桿率（最低兩倍幾），點買得落手？想造淡嗰便，唔得，因為冇P輪。遲吓如果有P輪登場，又係咪多手，理由係大概啲溢價上到半山高，而槓桿率與引伸波幅又屬於你要埋我份嗰隻。
章盛