自由黨最近暗箭橫飛，政圈大口仔傳聞，話有人要郁阿主席田北俊，雖然班黨員個個公開都話擁護田少，但係大家都知暗湧不絕。八方其實一早都收到風，當時唔敢相信，因為話晒田少喺自由黨根基好深，冇可能咁易被人叮走。
八方識得田少好耐，佢為人心直口快，又唔夠奸，其實不太適宜從政，加上做慣太子爺同大老闆，只有人擦佢鞋，叫佢聽晒人點就好難，所以佢想喺特區有所作為，本質上已經有問題；反觀煲呔嘅出身同訓練就剛好相反，合晒共產黨要求。
性格問題之外，田少第一死罪係佢當年憑良心做事，喺23條事件中，見到7.1有成五十萬人上街，毅然飛上北京問個究竟，結果回港就倒戈相向，連行會都放棄，投了反對票。一下子，田少成為了人民英雄，但係北京看在眼裏，當然記在心中。
安慰獎當政協常委
第二死罪當然係年初公開向記者批評煲呔公僕出身，不宜做特首，又話人隻手遮天；當時大家都唔知位清潔大隊長已經獲中央垂青，準備取董而代之。你話佢得罪權貴，後果會點呢？
第三個死罪，就係向老曾嘅大助手肥龍要求重返行會，重話自由黨有兩個位好合理，獅子咁大個口，你估肥龍點諗呢？
呢三宗罪都算喇，要補鑊都唔難，田少最大嘅罪名應該係心唔息，想同煲呔爭做第三屆特首，結果惹來殺身之禍，畀人消滅於萌芽階段。所以，人人都公開表態，話一定一定唔參選，就係咁解囉。
有知情人話，追殺田少事件會一直玩到明年三月，最後身為政協委員嘅田少可能得番個安慰獎，同吳光正一樣做番個政協常委，而自由黨就冇得再玩。咁早又咁激嘅預測，八方唔知信唔信好，大家等住好戲上演啦。
傳真︰2623-9278
電郵︰[email protected]