馬圈朋友評馬Ｆ請左丁山介紹英文補習老師，為佢嘅小兒子補習英語。香港家長好驚兒女啲英文唔掂，Ｆ仔雖然已入讀一間英語小學名校，評馬Ｆ仍然驚驚哋。
左丁山之教育下一代方法，唔贊成自小就請人補習，費事小童谷壞腦。因評馬Ｆ係行家，於是用賽馬術語講：「小學學生，等於周歲馬，都未識入閘，千祈唔好逼，要慢慢break-in，順其自然。隻馬到咗兩歲學入閘、試閘，識得展開腳步競賽，先至可放出賽。呢個時候，要培養佢嘅自信心，灌輸開步概念，到咗三歲先至催谷。人生係長途賽，小學階段只係短跑一二百米，考第一放頭，唔等於贏得，千祈咪咁快打鞭呀！」
評馬Ｆ話：「都要搵個好練馬師先至得㗎。」左丁山答：「唔好以為補習老師係練馬師，佢只係補針啫，練馬師係父母，學校教師係騎師。父母要在兒女小學階段，用慢火煎魚嘅練馬手法，令到兒女自動上力，自願睇書、自願作文，睇書睇得多，到咗中四就可以輕微催谷，訓練佢考會考嘞。」
古語有云：小時了了，大未必佳。一啲著名小學對學生施以極大壓力，學生攞到八十七分都要召見家長訓話：「你位千金追唔上進度喎，大部份同班同學都有九十五分，你要同貴子弟補習至得。」補鬼補馬咩，小學考第一，呃自己歡喜而已。有天份先至會由幼稚園到大學畢業都考第一，而呢類學生往往係唔使父母催谷、補習嘅。絕大部份其他學生都唔會由頭帶到尾，往往讀完中學，精力已盡，厭惡讀書求學，只會成為考試機器。左丁山請評馬Ｆ多帶兒子往圖書館、博物館、書局，喺屋企擺多啲中英文書，營造讀書氣氛，必要性陪埋佢一齊讀，一齊睇英文卡通、睇英語國家地理頻道，以身作則。呢個方法需時甚久，但係讀書邊會有捷徑。