徐子珊自卸任港姐後，即簽下無綫做經理人，佢近排出席公開活動時，有男影迷用DV機猛咁影佢，唔知子珊係咪好擔心人身安全，前晚放工即刻搵咗經理人Derek陪佢，兩人大撐枱腳。
會經理人傾前途
子珊同Derek前晚去咗坑口村嘅金葉軒食飯，兩個人食得好滋味，而Derek就唔停咁同佢講嘢，大約凌晨十二點半，子珊就碌卡畀錢，然後各自揸車離開。子珊噚日喺電話度話：「其實Derek負責接手做我經理人之後，一直好忙，都未正式坐低同我傾過工作安排，噚晚咪趁佢得閒約佢食飯傾埋，邊個畀錢都冇所謂。」子珊重話Derek有意安排佢跟老師學唱歌，搞到佢鬼咁開心呀！
訪問黎明冇尷尬
子珊噚日喺將軍澳電視廣播城出席娛樂節目革新活動，佢有份參與節目做主持，重會同新一屆港姐四周去訪問藝人，子珊今次係以師姐身份帶住一班新人，難怪佢話好大使命感，佢又話想訪問一啲有份量藝人，咁會唔會訪問緋聞男友黎明，子珊話：「呢啲等公司安排，都係做嘢啫，唔會尷尬，但我驚到時真係有機會訪問佢會忍唔住笑。」
