時到中秋，唔食個月餅，又點算過節呢？中聯辦副主任李剛都好應節，話過中秋喎，自己梗係都有食月餅啦，而且重要係雙黃蓮蓉嗰隻㖭，其間佢重大讚香港月餅，喺國內係名列前茅，好多人專登嚟香港買返去，自己當然都係捧場客之一。
數數手指，香港出品嘅月餅都唔少㗎，有啲重幾特別、幾創新，勢估唔到李剛都咁勇於嘗試，無論係冰皮，抑或係雪糕月餅，佢都有試過，重大讚好好味，講嘅時候真係差啲流埋口水。
李剛更加自爆，𠵱家幾乎日日都食月餅。嘩，月餅嘅卡路里都唔少嘢，日日食，真係唔怕肥呀？點知李剛指指自己魁梧嘅身形，笑笑口話「幾標致、幾標準」，果真對自己信心十足！
傳真︰2623-9278
電郵︰[email protected]