沒見慧慧一個月了，自從她拍拖後，我們就不再像從前幾乎天天見面了，這個周末卻突然跑來找我，「Surprise？」正在田裏捉蟲的我，自不會放過她，齊齊緝拿害蟲！
「嗱，呢啲叫二十八星瓢蟲，專吃青椒、矮瓜、白菜，啲瓜果被佢咬過，就會鑽滿晒窿，見到佢哋，就地正法啦！」「咦，係咪呢啲，㩒扁佢先。」「咪住，呢啲係瓢蟲，唔係二十八星瓢蟲，咪殺錯良民呀！牠們雖然相似，但性格相反，瓢蟲不會為害農作物，還會為我替天行道，把專吃我的菜葉和粟米的蚜蟲消滅！」「其實，大自然都一樣，一物治一物。」一向霸霸道道呱呱嘈的慧慧突然有感而發，還不是為了新男友Dave！「唔知點解我會乜都聽佢話，佢話唔好着吊帶衫，我就唔着；唔好過12點返屋企，我連蒲吧都唔敢，我好憎自己！」愛情盲目係人都知，只是幾時開番眼，幾時盲到撼頭埋牆，粉身碎骨，或從此愛上黑暗就無人預料到了。（十）
阿花