林海峰（Jan）下月會在伊館舉行talk騷，日前阿Jan專誠到不同的售票處視察形勢，不少fans表示在軟硬時代已追隨林海峰，難怪阿Jan笑說今次是大型招魂活動。而五場騷不但已火速爆滿，昨日更宣布加開兩場。
林海峰首個個人talk騷「是但噏發花癲」下月舉行，他日前到多個城市電腦售票處視察，他先到文化中心，再到銅鑼灣通利琴行，五場門票已經火速賣清，昨日阿Jan宣布加開下月十一及十七日兩場。
宣布加兩場
林海峰說：「我本來怕賣唔晒啲飛，𠵱家加場重驚，我驚似迪士尼咁，大家期望好高，入到去就挑挑剔剔，又話要排隊、酒店差，又話食物水準唔夠，我有好大壓力，好彩我個場細過迪士尼。」問到會否請欣宜任特別嘉賓，林海峰說：「呢啲留畀杜汶澤講啦，人哋都未必得閒，唔通叫佢嚟錫我一啖咩，唔好啩，人哋女仔嚟㗎。」
阿Jan日前笑謂會將滯銷的門票放上網減價促銷，阿Jan日前不改一貫玩嘢本色說：「人哋阿Rain啲飛就高價喺網上炒賣，我諗我啲飛就要割價喺網上拋售先至可以賣得晒。」
當日阿Jan在文化中心遇上一名忠實擁躉謝小姐，她拿着門票要求阿Jan替她簽名及合照，並表示於軟硬天師時代已十分欣賞他。
阿Jan亦自知很多捧場客都是以前軟硬的fans，他更搞笑地將今次的表演比喻為一次大型的招魂活動。
無意講家人
阿Jan又透露已買了一塊鏡在家中練習，問他到時會否講及女兒及太太時，他說：「今次個騷應該同做訪問唔同，前排做訪問時啲人不停問我老婆同個女嘅嘢，我都覺得冇mood，我同我阿媽都未有講得咁清楚啦，我做乜要聽你嘅解釋。」
採訪、攝影：李珮洳、王連連
