發展商鋪天蓋地式宣傳策略，似乎成為開新盤嘅趨勢。好似恒基近排密密催谷上環新盤聚賢居，雖然只係得三百八十幾伙，規模唔算大，但宣傳工夫一樣大堆頭。
負責銷售嘅恒基營業部總經理謝偉銓，噚日由朝宣傳到晚，最先係直升機宣傳，跟住連走兩場代理誓師會，又要做代理分行開幕嘉賓，走足四個不同場合，推銷個盤。
恒基整咗幅五十乘一百米嘅巨型橫額，上面寫上聚賢居中英文名。噚日一朝早，就叫齊傳媒去到舊啟德機場睇呢幅橫額。直升機拉動呢幅橫額，即日起喺維港上空飛行，高空宣傳樓盤。
呢一招，恒基舊年宣傳西灣河嘉亨灣用過，估唔到今次單幢盤都照用，聽聞，費用要六位數字。
電郵地址：[email protected]
