恒指波幅139點，差少少先至夠1%。恒指末日C輪3939，波幅則達25%，末日P輪3631波幅更達38%。所以話，炒兩隻輪咪重手。
恒指埋單跌45點，跌幅超過20%嘅窩輪約有20隻，升幅超過20%嘅窩輪則只有6隻。是日輸家又係多過贏家。
中石油（857）高低價6.25元/6.15元，收中間價6.20元，只係上移1格。呢1格嘅變化，睇嚟好似好細，但啲相關C輪與P輪，則郁動得好大。前日收市掟10萬元買熱門C輪3500，昨日收市變12萬元。掟10萬元買熱門P輪9101，則得番8萬元。正股1格之微，造成輪價升跌2成。
中石油C輪3500：3500明年2月尾夠鐘，輪價60仙，溢價6.5%，槓桿率10.3倍（有效6.6倍），引伸波幅27%。嚴格計數，正股昨升5仙，隻輪理論升幅3.2仙，實際升10仙，升凸咗。
中石油P輪9101：9101又係明年2月尾夠鐘，輪價26仙，溢價7.4%，槓桿率23.9倍（有效8.4倍），引伸波幅23.9%。嚴格計數，隻輪理論跌幅係1.8仙，但昨日跌夠6.5仙，跌凸咗。
章盛