前日嘉華國際(173)同嘉華建材(027)公布業績,一併落實向嘉國股東派發嘉建股份的計劃,雖然只係10股送1股咁大把,但消息公布後,人人都估對嘉建股價有壓力,但噚日表現又唔似喎,嘉建平收5.40元,冇起跌,反而嘉國就跌0.88%,收2.825元。
嘉國派送嘉建股份呢單消息唔係新鮮事,在市面上已經傳咗一排,小初之前都好似多口講過兩句。嘉國股價其實喺今個月已經升咗唔少,唔排除有人趁好消息沽貨,反而嘉建股價先前冇升,可以企穩。
但經紀陳話唔好咁快下結論,可能要等嘉國除淨後,先至見真章。
早前俾人睇好嘅信德集團(242),公布業績核心盈利倒退,只靠重估物業收益頂住。雖然之前唔少人都估到有呢個情況,但因為花旗調低投資評級,隻股噚日一度跌至6.05元,好彩收市跌幅收窄,抽番上6.30元,跌4.55%。
經紀黃話,唔少投資者買信德,主要係睇好明年預售澳門地產收益,唔明點解大戶要沽得咁盡。
慕容小初