「最上鏡小姐」鄧上文早前與家人提早歡度中秋，其父鄧英敏表示今個中秋對他們一家有特別意義，慶祝女兒得獎之餘，亦為即將返回澳洲升學的兒子上言餞行，一家四口專程到西貢燒烤，共享天倫之樂。
應屆港姐「最上鏡小姐」鄧上文（Shermon）早前聯同家人到西貢燒烤提早慶祝中秋節，Shermon表示由於其胞弟上言（Chris）在中秋節之前要返回澳洲繼續學業，所以預早與父親鄧英敏、母親及胞弟抓緊機會聚在一起慶祝佳節，人月兩團圓。
鄧英敏表示一向珍惜與家人相聚的時間，今個中秋對他們一家來說更是別具意義，他說：「慶祝中秋之餘，又慶祝個女Shermon攞到最上鏡小姐，個仔Chris之前趁學校假期返嚟睇家姐比賽，𠵱家要返澳洲開學，順便同佢餞行。」
番書女玩燈籠賀節
Shermon表示其父、母均有眾多兄弟姊妹，平日普通家庭聚會閒閒哋都有幾十人出席，她說：「爹哋有八兄弟姊妹，媽咪就有七兄弟姊妹，每次有聚會都好熱鬧，雖然我同細佬以前都喺香港讀國際學校，不過都好知傳統節日係做乜，中秋就梗係食月餅同玩燈籠啦！至於燒嘢食都係希望一家人圍埋一齊聚吓，大家都好enjoy㗎。」
父支持加入娛樂圈
對於女兒當選最上鏡小姐，問鄧英敏可會贊成女兒加入娛樂圈？他說：「佢都讀完大學囉，有興趣又有機會都不妨試吓，我自己喺無綫讀第三期訓練班，同周潤發、盧海鵬係同期同學，我都攞無綫三十年老人牌，舊年十二月先同無綫約滿，只要個女鍾意嘅都會支持。」
採訪：卓美娟 攝影：何國豪
