相隔十年十月再喺紅館開《草蜢我們的演唱會》嘅草蜢，噚日去商台做足七個節目，總之無處不在咁谷宣傳，商台重特登整咗三個員工證畀佢哋。
手指尾托月餅
草蜢三個亦都好識做，話當正自己係商台ＤＪ，重派月餅畀班同事食。講開佢哋嘅演唱會，阿智為咗顯示佢呢排操得幾咁fit，就用兩隻手指尾托起盤月餅，佢重話好多老友都想訂啲握手位同佢哋握手，但係阿細（蘇志威）就話：「其實觀眾坐得愈高愈睇得多嘢。雖然個台唔會成日升上去，但係一定有突破。」
呢次演唱會，草蜢得到鑽石公司贊助鑽飾，佢哋話到時會有好多保安睇住，阿細話：「如果我哋真係跳跳吓fing甩咗，咁到時會有幾個保安走埋去請個觀眾交番出嚟，至多我用香吻交換番。」傑仔重加多句話：「至多我用個田螺嘴錫番啦！」