開門七件事：柴米油鹽醬醋茶，其中醋的用途廣泛，當然要佔一席位。林林總總的醋當中，邊種打邊種，邊樣有乜用，你又知幾多？
記者︰劉昱蘭
攝影︰周旭文、陳陶鈞
Model︰Fion（TheGroup）
貴價意大利黑醋
呢兩支醋的容量同益力多差唔多，但價錢就貴到飛起，皆因佢哋係身價最高的極品醋——意大利黑醋，重要係有年份的25年黑醋，發酵時間愈長，味道就愈濃厚。兩支醋分別嚟自意大利北部區的Modena及ReggioEmilia，嗰度啲葡萄極靚，所以出產的黑醋，被認可為傳統意大利黑醋。
一般黑醋係用嚟點麵包食，但無理由用支貴醋嚟點幾蚊塊麵包咁「豪」啩？所以啲人多數買嚟整鵝肝醬汁呢啲貴價菜。有啲日本遊客專程嚟只係為咗買一支醋咋。
售價︰每支$1,550/100毫升（e）
食得健康
大力5度米醋
飲用浸過生雞蛋的米醋，有助降膽固醇。醋有殺菌能力，5度米醋夠力殺滅雞蛋的菌，浸佢兩三日至蛋殼浸溶咗，攪拌後加水或蜜糖就可飲用。4両醋浸一隻蛋，夠一星期飲用。
售價︰$16/600毫升（a）
減肥蜂蜜蘋果醋
每日飲1份30毫升的醋加5份水，有助減肥。醋的氨基酸可將脂肪轉變成體能消耗。西醫認為醋能抑制體內鹽份過剩，穩定血壓。中醫亦說醋可活血。
售價︰$80/600毫升（c）
即飲蘋果醋
呢款蘋果醋毋須開水，可直接飲用好方便。有低糖純蘋果醋及加有黑醋的蘋果醋等選擇。
售價︰$38.8/1000毫升（c）
蘸吃佐餐
大閘蟹良伴鎮江香醋
差唔多到食大閘蟹的時候，點少得佢嘅絕配——鎮江香醋。
鎮江香醋因經長時間發酵，所以產出的醋酸、氨基酸更多，故以鮮美醋味馳名。它以糯米為原料，先經過浸酒過程，酵母把糯米中的糖份發酵成米酒。然後製醋，在米酒中加入微生物，將酒精轉化成醋酸。
屋企一定要有一支香醋，皆因佢食法最百搭，用來蘸點小籠包、點心，或配麵食都得。
售價︰$8/約250毫升（d）
即食蟹醋好方便
醋入面已加入糖，毋須再調味，只要加啲薑絲即可享用，少啲步驟多啲方便。
售價︰$8/約200毫升（d）
酸咪咪陳醋
陳醋同香醋用法大同小異，都係用來蘸點心，但陳醋味道較酸，皆因佢以高粱為主要原料，比用糯米製的香醋更酸。
售價︰$12/500毫升（a）
大紅浙醋助消化
浙醋同香醋一樣由米發酵而成。大紅浙醋可以中和硬身的食物，如魚翅之類的膠口硬身食物，以幫助消化。另外食麵時加點浙醋，醋酸可中和鹼性的麵食。
售價︰
$10/300毫升（a）
烹調啱用
淡淡果味醒胃
除咗黑醋，西方人都鍾意用果醋嚟烹煮肉類，令人進餐時可感受到生果清香，零舍開胃。圖中新出品的意大利果醋，有香橙及紅莓選擇。
售價︰$138/250毫升（b）
甜醋煲豬腳薑
孕婦生完BB食的豬腳薑，主要係用由白米酒及橙皮、丁香等香料釀製成的甜醋煲。產前一個月已經用甜醋浸定啲薑，生完BB之後就加埋豬手豬腳落去煮。
售價︰$25/600毫升（a）
2度米醋醃製食物
八珍的米醋分2度及5度兩種，度數代表醋酸度，2度醋即係無咁酸，通常用於煮食或者醃製食物，如醃紫薑、青瓜等，煮酸甜排骨都係靠佢。
售價︰$11/600毫升（a）
甜醋拍檔黑糯米醋
煲豬腳薑到咗落豬手豬腳的時候，要加啲黑糯米醋，令到豬手豬腳肉無咁實先好食。
售價︰$16/600毫升（a）
紅白雙煞除腥味
另一種西方人常用的醋就係酒醋，有紅、白酒醋等，常用於烹調肉類、海鮮等，解腥助鮮。想食得健康啲，重有有機白酒醋畀你揀。
售賣點︰
（a）八珍旗艦店：旺角花園街136A（23948777）
（b）city'super：銅鑼灣時代廣場B1地庫（25062888）
（c）Freshmart：銅鑼灣軒尼詩道555號崇光百貨（28338338）
（d）永昌號：銅鑼灣白沙道2E地舖（25772411）
（e）Great：金鐘太古廣場2期地庫（29189986）