煲呔呢排當紅，加上佢要同各方打好關係，為冧莊鋪路，所以國慶酒會佢基本上都逢請必到。好似噚日咁，一連三場，分別由中華總商會；蘇、浙、滬各界人士；同工業總會做東，煲呔都去晒。八方擔心煲呔日日食咁多餐，連任時會變咗好似肥平咁。
唔得閒睇京劇
蘇、浙、滬同鄉嘅酒會同場加映京劇《穆桂英掛帥》，不過煲呔唔得閒睇，因為佢要趕去工總食飯。雖然噚日係工總四十五周年紀念晚宴，但全體領導清一色戴晒煲呔去恭候煲呔，好似變咗同佢做生日咁，陳永棋重叫煲呔寫施政報告時，記住諗七年大計。煲呔梗係四萬咁口啦，猛讚工總啲老闆好多貢獻，喺內地工廠請嘅夥計重多過所有香港人。咦！係咪暗示佢哋應該都返香港請吓人呢？工總都幾搞鬼，搵咗十二個識玩樂器嘅會員，組咗隊「工總十二樂坊」表演。
除咗畀面派對，煲呔噚日重去咗公務員事務局嘅嘉許禮，該局局長王永平親手頒獎畀三十四個部門七十四位公務員，得獎者如果做夠二十年，可以即刻攞到公費旅行獎，每人一萬四千蚊。
除咗有錢，重有得同「你嘅CE」曾蔭權握手影相。細曾爆料話，自己做公務員頭嗰六、七年都曾經洩氣過，不過好彩佢嘅努力同付出最後都得到認同，勉勵班得獎者就算有咩挫折，都要堅持拼搏到最後一刻！至於拼搏完有冇得好似佢咁入住禮賓府，細曾就冇講到。
爆料熱線：29290000、27860099
報料傳真：26239278
報料電郵：[email protected]