以往當曼聯Fans碰上車仔迷，都只有流於牙骱戰，不過由今個星期開始，就可以初則口角，繼而「動手」喇！事關KONAMI隻《WinningEleven9》終於推出PSP版，可以話係PSP推出以來，首個最具人氣嘅大作，雖然今集無咗MasterLeague，不過就加入更好玩嘅無線對戰功能，以後曼聯Fans見到車仔迷，唔使講咁多，就可以即刻鬥番場，比個高低！
記者、攝影：許福合
KONAMI啱啱先喺PS2上推出《WE9》，短時間內再推出PSP版；機迷反應都非常熱烈，首日傍晚到貨，有舖頭表示一晚已經去貨500-600隻！銷情絕對比PS2版更厲害，而且隻Game重有帶動出機嘅作用，據知平均每10個人買Game，其中有3個人會連PSP機一齊出，真係唔講得笑！
𠵱家PSP《WE9》行貨價大概做緊$319，不過好多舖頭手上嘅貨都已經賣到八八九九，下批貨最快都要兩個星期後先返，所以貨源都相當緊張吓，會唔會被炒起？相信只係時間嘅問題，要買Game或者出機，奉勸大家最好要快手！
20米範圍 2人對決
今次PSP《WE9》大有NDS《任天狗》熱烈情度，唔少人重專登出部PSP嚟玩，除咗《WE》一向都係香港機迷至愛遊戲，PSP版可以拎住出街玩同埋隨時無線對戰，先係吸引力所在。無線對戰部份設定其實同PS2版網上對戰好相似，不過唔同嘅係只支援1on1對戰（當然2部PSP各自要有盒《WE9》），開啟無線功能後，就可進行玩家檔案設定、翻查成績，之後設定就同單機版無咩分別，而遊戲進行時，一般喺20米範圍內，都可正常接收比賽，當走太遠就有機會令畫面窒吓窒吓，甚至斷線，所以鬥緊波時，最好都係坐定定，踢到一半斷線就非常掃興喇！
20-30秒Load場波
PSP同PS2手掣都算係同一個設計，所以操控方面，要上手絕對唔難，操作更係傳統《WE9》玩法，要數唔習慣嘅話就係轉用粒「Joytstick」來玩，筆者集合唔少試玩過人士嘅意見，都話覺得難用，不過喺網上亦有《WE》高手話用Joystick來玩，反應會比較快，甚至有啲動作要用Joystick先做到，所以各位細哨同施丹Fans，要想學偶像玩吓花式，就要多下苦功！
今次PSP版多方面都令人滿意，甚至有人話「畫面重靚過電視睇」，尤其比賽時球員動作流暢，大有PS2版嘅水準。要彈嘅地方亦有，首先當然係無咗《WE》迷至愛嘅MasterLeague模式，雖然無線對戰同樣好玩，但Fans玩落始終少咗啲嘢咁！另一樣Loading時間，每次開一場波，都要約20-30秒時間，雖然未及「叮」個杯麵，與其他PSP遊戲相比，就略嫌稍長！
大疑雲！新Game打唔到？
買咗隻新Game當然想第一時間試玩，而筆者喺遊戲店觀察所見，有部份急不及待嘅機迷，立即拎出愛機來玩，但竟然發覺玩唔到！原來今次《WE9》係需要配合最新PSPver2.0操作，如果未Update都唔緊要，UMD內就包埋系統更新檔，只要駁上電源就可以開始Update，連下載時間都慳埋。
一開機當然唔少得一段CG片段，與PS2版相比，似乎略為失色，唔夠刺激，不過當去到細哨玩花式一段，就真係值得一睇再睇，畫面逼真流暢，再一次證明PSP嘅強勁機能！當去到日本隊波衫做底色嘅Menu內，就可以見到各種比賽模式，最底「WIRELESS」就係無線對戰，要留意「Option」內有可與PS2經USB連線嘅設定，可以將遊戲資料互換，免得再一次編輯球衣同球員資料。今次《WE9》更有遊戲店提供電郵Save服務，機迷經電郵收到Save後放落MS，就可以將球員、球隊名字一次轉換，比PS2版還要方便。
遊戲資料
主機：PSP
開發：KONAMI
類型：運動
售價：$319
PSP機迷力撐《WE9》
同場加映：《真‧三4猛將傳》真‧正到貨
今日喺日本正係東京遊戲展正式開Show，所以好多勁Games都搶住推出，除咗PSP《WE9》外，另一款大作，《真‧三國無雙4猛將傳》亦於今周推出，返貨日曾經一再延遲，令唔少機迷撲咗幾次空。
《猛將傳》係《真‧三國無雙》系列延續，加入新關卡、新武器、新道具、新遊戲模式等內容，不過講到最有原創風味，就不得不數新加入嘅「外傳模式」，外傳模式內分為18個全新版圖，進入每個版圖都會提供幾名指定武將讓玩家選擇，每名武將都與版圖本身有所關連，基本上跟足歷史去玩，以完成該武將任務為目標。另外，玩家如果擁有《真‧三國無雙4》嘅Save，亦可滙入使用，各武將嘅能力都可延續到《猛將傳》去玩。
新增立志模式
《猛將傳》首次加入立志模式，玩家可以自己創造角色，以一個士兵身份去進入三國。遊戲一開始，玩家將成為三國名武將如關羽、張飛等嘅部下，參加戰鬥後就可以建立功勳，最後有機會成為名武將左右手。一開始時由於玩家只係兵卒一名，攻擊次數有限，甚至無法使用無雙亂舞，不過隨着身份提升，可獲得技能或武器，戰鬥力可以得到提升。玩家亦會因活躍受到注目，會收到由敵方武將所發出之挖角邀請，甚至會被軍師睇中，成為「埋伏之毒」執行者，大玩三國版無間道！
遊戲資料
主機：PS2
開發：KOEI
類型：動作
售價：$280
DreamStore（25753285）
地址：香港灣仔東方188商場256號舖