鄭伊健噚日喺銅鑼灣出席相機宣傳活動，一提到被雜誌偷拍足足三十日，佢就好勞氣。伊健話同梁詠琪絕對冇分手，又話覺得本雜誌好離譜同好過份，睇完之後覺得好侮辱。本雜誌又話伊健喺屋企睇成人台三級片，佢噚日就好輕鬆咁一笑置之。伊健又話電視同電影𠵱家都有分級制，希望政府都可以修例管制吓啲雜誌，同埋增加公民教育咁話喎。
俾人影咗都唔知
而梁詠琪噚日出席喺尖沙嘴搞嘅活動上，亦澄清同伊健分手一事，佢話：「我同伊健現實生活喺一齊。」大家都好奇怪點解佢咁講，GiGi話：「因為我當件事係古仔睇，我覺得佢（伊健）好慘，本來屋企好舒服，都俾人影，佢同我講佢都好嬲，嬲係點解俾人影咗成個月都唔知，同埋最怕影響到鄰居。」
至於報道話伊健睇鹹片嘅事，GiGi就話：「我都係聽到同事同我講話伊健睇鹹片，我都想睇係乜鹹片，點知咁矇，佢都咁大個人，我唔會問，我睇就話出奇啫！咁大個人唔通睇迪士尼卡通咩！」
