過去幾個月市況淡靜，大家都感覺到，但實際情況係點，就講唔出，不妨睇吓中記嘅摸貨統計資料，因為可以顯示市場有幾活躍或熾熱。
中原黃良昇話，上個月十大屋苑摸貨只得十三宗，比七月減少三成八，又係連續第三個月下跌，重首次跌破二十宗關口，累計跌幅近八成八，反映今年銀行數度加息，令投資者卻步。
呢十個新落成嘅屋苑，有一半完全冇摸貨登記，食蛋嘅有尖沙嘴擎天半島以及長沙灣昇悅居等。
不過，有摸貨嘅屋苑，幾集中喺個別屋苑，好似長沙灣宇晴軒，就包辦咗六單，其餘嘅，都係得一至兩單。西九龍除咗宇晴軒，長沙灣泓景臺都有兩宗摸貨，唔通真係好似風水師所講，西九龍食正地運？
電郵地址：[email protected]